388.

Ich Alhait von Reinspereh tun chunt allen den die disen prief hörnt vnd sehent, daz der chriek der zwischen minen herren Emehen dem bischof von Frisingen vnt mir gewesen ist vmbe die hübe vnt vmbe den man dacze Haberuelde, also geschaiden ist mit vnser baider gutem willen, daz ich gütlichen vnd zedurchslacht von der hübe dacze Haberuelde gestanden pin der ich iach von dem gotshause von Frisingen ze lehen, auf die genade daz mir min herre pischof Emche von Vrisingen die hübe diu da haizet an dem Hirn, gelihen hat ze rehtem lehen vncz an minen tot, an waltgemerche vnd an zehenten vnd an marchfuter, vnd sol daz haben als andriv miniu lehen div ich han von dem selben gotshaus, vnuerchumbert, verchumbert auer ichz darüber, so si daz selbe gut dem gotshause von Frisingen ledich. Des sint gezivge graue Gerhart der probst von sant Andre, herre Friderich der prost (!) von Mosburch, graue Emche der probst von Wertse, maister Rûdger vnt herre Herwort die chorherren von sant Andre, herre Otte der pharrer von Nivenhouen, herre Ekhart von Vihdorf, herre Chünrat von Vanstorf, herre Albreht der Proter, herre Arnolt der Piber, herre Otte von Zaelkingen, Otte vnd Albreht von Vihdorf, Wluinch von Randek, Richer Wolfstain. Diser prief ist ge geben dacz Waidhouen, nach Christes gebúrt tausent iar, zwai hundert iar vnd in dem fünf vnd ahzegisten iar, des Phinztages nach dem Ostertage.

Orig., Pgt., anbgdes wohlerhalt. Sigel, k. k. geh. Haus-, Hof- und Staats archiv zu Wien; mit Datum 13. Apr. Urkunden!) d. L. o. d. Emis, IV. 33, Nr. 37.