Ich durinch der Piber offenn vnd vergich allen den, die disen brief sehennt oder horent lesen, das mein swester Offmey hern Vlrichs hausfrawn von dem Stain mit meinem guetlichen willen jren Satz auff den dreyen taylen auf dem hof dacz dem Tannehof, den jr jr. swester her Hartmuet (sic) vnd ir wirt fur jr aigen, das ir verkaufft ward, drey und dreissig phund Wienner phenning durch got vnd ob jrer Seel zu einem ewigen seelgeret gegeben vn d eingeanttwurt hat dem gotshaws vnnser frawen vnd der Sammung dacz pawngartenperg, do Sy das wol getuen mocht, mit all dem Recht, als Sy jn hat jnn gehabt vnuersprochenlichen also, wann got vber sy gepewtt vnd auch nach meinem tod, das die vor genannt sammung baide jr vnd auch mir alle jar dauon sullen begeen ewiclichen jn dem Closter einen jartag, als sitlich vnd gewonlich ist in dem Orden. Vnd daruber das dits geschefft vnd der vorgenanten meiner Swester seelgeret stet vnd vnzebrochen beleib, gib ich dem vor genanten Gotshaus vnd der Sammung disen brief besigelt mit meinem jnnsigel, wann Si selb niht jnnsigels hat, zu einem waren vrchund. das ist geschehen, da von Crists geburde ergangen waren Tausent jar vnd zwai hundert jar vnd darnach jn dem Sechsundnewnczigisten jar an Sand Cholmanstag.

Source Fulltext: OÖUB 4 (Wien 1867) S. 244, Nr. 270