Ich Chvnrat vnd ich Rv^eger vnd ich Ott vnd ich vlreich di Hauser tv^en chvnt allen den, di nv sind oder di hernach chvnftig werdent, di disen Prief sehent oder ho^erent lesen, daz wier vnuerschaidenleich vnd mit aller vnser erben gv^eetleichem willen alz vnser aigen datz Stroench aecher vnd weingarten, besv^echt vnd vnbesv^echt verchauft hawen dem abbt vnd der samnung datz Paumgartenperg ledichleich vmb ein benantz Gv^et, vnd sein auch des selben gv^ets gaentzleich gewert vnd schvll wier vnd vnser erben des vorgenanten aigens des vorgenanten abts vnd der vorgenanten samnung Gwer sein nach Lantsrecht. vnd darvmb, daz disev red gantz vnd vnzebrochen beleib, geb wier dem vorgenanteu Gotshauss datz Paumgartenperg dis Hantuest versigelt mit vnser vier insigel ze eim ewigen v^erchvnd. Des ist gezevch Der Margart von oesterberch, der Betzel von oerbyng. Der Levtold von oerbyng, Der vlreich von dem stain, Der Ott von soechsen, Der Hoertneyd von chv^elevb, Der Chvnrat von vlachenek, Der Hainreich vnd der Margart von o^ed, Hainreich vnd Chvnrat vnd Fridreich vnd alram di stainer, Hainreich von Ymzing, Walchvn von Mitterchirchen, Fridreich vnd Chvnrat di Loempel, Rv^eger von Lantzenperg vnd darzv° manch pidber man. Ditz ist geschechen, do von Christs gepv^ert ergangen warn Drevtzehen hvnder Jar vnd darnach in dem Dritten Jar Des nachsten svntags nach dem Perchtag.

Source Fulltext: OÖUB 4 (Wien 1867) S. 426-427, Nr. 461