Ich Herweich von dem Holtz vnd frowe Peters mein hovsfrowe veregehen vnd tv^en chvnt an disem prief allen den, di nv sint vnd hernach chvmftich werdent, daz wier vnser vichswaid o\vf der pechslag ze cho^efen gegewen hawen vnsern herren vnd der samnvng von povmgartenperg vmb ainlefthab (sic) phvnt phenning wienner mv^encz vnd hawent mich o\vch der selwen phenning schon gewert, vnd ist daz geschehen mit meiner chind gv°tleichen willen Herweigs vnd vlreichs vnd o\vch ander meiner chind iz sein sv^en oder tohter, vnd svln o\vch derselben vichswaid ir scherm vnd ir gwer sein an aller stat vnd man si anspricht vor reht, waer aber, daz wier niht wern, so schvln vnserev chint di vorgnanten Herweich vnd vlreich ir gwer sein als reht ist. vnd swo wier des niht entaeten, swaz si des schaden naemen, daz schvln mein herren von povmgartenperg hawen o\vf alldev vnd wier hawen in dem land. vnd gib in disen prief zeinem vrchvnd vnd zeiner westsetigung mit meim insigel versigelt. Des sint gezevg her Otto von celking, her Marquart von osterberch, her wetzel von oerwing, her vlrich vnd her levtolt von Mitterberch, her vlrich von dem stain, her Ott von soechsen, her Hoertweich von chv^elib, her Chvnrad von vlachnek, Chvnrad der stainer, Heinrich der umzinger vnd darzv° manich biderb man paidev riter vnd chnecht. Daz ist geschehen, do von Christ gebv°rt ergangen sint Tavsent iar, drevhvndert iar in dem andern Jar, des vreitags in der osterbochen.

Source Fulltext: OÖUB 4 (Wien 1867) S. 413-414, Nr. 445