Ich Hertweich von dem holtz tuen kvnt offennlichen allen den, die disen brief ansehend oder lesen ho^erenndt, das ich durch meiner seel willen vnd durch meines lieben brueder Vlreichs seel mit seines Suns Gotfrids guetlichem willen vnd aller vnnser Erben verhenknus gegeben han dem gotzhaws vnd der Sammung hintz Pawngartennberg zu dem Liecht der Gusterey vnnsers freyen aigenns zwo hofstet datz Sachssenndorf vnuersprochennleich mit aller Aigenschafft als ich Sy vnd mein Vodern Ennher gehabt haben in Rechter aigens gwer Also, das man von denselben zwain hofsteten alle Jar dienen sol zwelf phenning Purckrechts an Sannd Michelstag vnd bin ich vnd der vorbenant Gotfrid meines brueder sun vnd all vnnser Erben desselben guets desselben gotshawss vnd der Sammung Scherm vnd Gwer nach Lanndes Recht, wo in des not geschieht, an alle widerred. Das ditz geschefft vnd Seelgeret hinfürbaz sta^et vnd vnnzebrochen beleib, darüber gib ich dem vorbenannten gotzhaws vnd der Sammung datz Pawngartenberg disen Brief bestettigt mit herren Marquarts Innsigel von Osterberch des Lanndrichter vnnd mit mein selbs Innsigell zu einem Vessten vrchundt. Das ist geschehen, da von Crists geburd erganngen waren drewtzehen hundert Jar vnd darnach in dem drewtzehennden Jar des Sunntags zu MitterVassten.

Source Fulltext: OÖUB 5 (Wien 1868) S. 106, Nr. 103