Wir Abbt Christan vnd di Samnung dacz Pavmgartenperg veriehen vnd tvn chund alle den, di disen prief lesent oder ho^ernt lesen, daz vns her Christan der Trugsaetz von Lengpach vnd sein hausvrow vrow Elspet vmb ir paider sel hail vnd ir vodern zehen phunt gult wienner phenning irs rechten Aigens, daz leit in dem obern Amt ob dem aenzeinspach vnd der selben zehen phunt wirt wol funfzehen phunt, gegeben habent als beschaidenleich, daz der selb her Christan dasselb gu^et inn schol haben, di weil er lebt als lang, vntz er vns daz vorgenant gut gutleichen auf geb vnd nach seinem to^ed so schol di selb gult ledichleichen zv vnserm Gotshaus geho^ern vnd schol auch swer des Pitantzen Amt pfligt, di selben gult inn haben vnd schol da von geben all vreitag durch daz iar dreizzich pfenning vmb visch der Samnvng in das Reuent; dar vber schol er auch derselben Samnvng igleichen pruder besunder vber sein gesatzt phru°unt geben einen loffel o^els, der sibenzehen gen an ein phunt alle vastag durch daz iar von der selben gult; vnd schol auch derselb Pitantzner der selben Samnung von der vor genanten gult zwai dienst geben igleichs von zwelif Schilling, der selben dienst schol man ains geben an dem phingst Abent vnd daz ander an aller sel tag, swo man des nicht entffit, so schol sich der vorgenant her Christan vnd nach im sein erben der selben gult vnderwinden als lang, vntz diselb phrunt vnser Samuvng paidev an vischen vnd an o^el als vor genant ist, ervellt wert, swann daz geschiecht, so schol vns di vor genant gult ledich sein als ê vnd schol auch der selb her Christan vnd sein erben desselben guts vnser scherm vnd vnser gwer sein, waer auer, daz der vorgenant her Christan oder sein erben vns vngu^etleich taeten an dem selben gut, daz schol vns der Herzog hintz in pezzern als zeitleich ist. Dar vber offen wir, daz wir dem selben hern Christann vnd seiner Havsvrowen vnd ir vodern durch di grozzen lieb, di wir zv in haben, gelobt haben, ze sprechen alle tag ein selmess auf des heiligen Chrevtz Alter ir sel ze trost vnd zehail. vnd daz disev red staet vnd vnzeprochen beleib, so geb wir dem vor genanten hern Christann vnd seiner hausvrowen vrowen Elspeten disen prief versigelt mit vnserm insigel zv einem ewigen vrchund. Der prief ist gegeben, do von Christs gepu^erd ergangen warn drevzehen hundert iar vnd dar nach in dem Sechzehenten iar des mitichen in der phingst wochen.

Source Fulltext: OÖUB 5 (Wien 1868) S. 165-166, Nr. 167