ICH Christan der Drugsecz von Lengpach vergich vnd tuen chvnt alle den, die disen prief lesent oder hoerent lesen, Daz ich mit verdochtem muet vnd mit meiner havsvrowen Elspeten vnd mit vnser paider erben guetleichem willen gegeben han dem Gotshaus vnd der samnung dacz Pavmgartemperg zu einem selgeret meiner sel vnd derselben meiner hausvrowen vnd aller vnserr vordern sel meins vrein aigens, daz leit pei Lenpach in dem obern Ampt in dem Aenzeinspach siben gu^et, als ich daz hie benenn: Den hof dacz Reichpetenpach, den hof dacz woluerstorf vnd selb zwo hofstet, Den hof dacz hag, ein lehen dacz Algerspach vnd ein hofstat an dem perig mit alle dev, vnd zv dem vorgenantem guet gehort, versu^echt vnd vnuersu^echt vnd mit alle dev vnd iz dient, iz sel groz oder chlain, swie daz benant ist, daz han ich getan mit sogtaner beschaidenhait, daz ich daz selb gv^et, die weil ich leb, schol inn haben als lang, vncz ich dem selben Gotshaus daz selb gv^et mit verdochtem mvt gern vnd gvtleichen auf gib vnd noch meinem tod so schol daz selb gv^et hincz dem vorgenanten Gotshavs gehoren ledichleichen vnd an all ansprach aller meiner erben Vnd schol, swer des Pitanczer ampt pfligt, daz selb inn haben vnd schol alle vreitag durch daz iar dreizzich phenning vom dem vorgenantem gv^et vmb visch geben der samnung in daz refent; dor vber schol er auch der selben samnung geben ichleichem bruder besvnder vber sein gesatzev pfrvnt einen loffel o^els, der sibenzehen an ein phvnt gen, alle vastag durch daz iar. vnd schol auch der selb pitanczer alle iar von dem selben gv^et geben der samnung swai dienst ichleichez von zwelif schilling, der selben dienst schol er ainz geben an dem pfingst abent vnd daz ander an aller sel tag. Swo er des nicht entet, so schol ich mich vnd noch mier mein erben des vorgenanten gv^ets allz lang vnderwinden, vncz dev selb pfrvnt peideu an vischen vnd an o^el vnd auch an dem diensten, alz vor geschriben ist, der Samnung ervollet werd, swan daz geschiet, so schol wier in ir gv^et wider ledich lazzen vnd schol auch ich vnd alle mein Erben lautterleich durch got des selben gotshaus des selben guts schirm vnd gwer sein nach lands recht, wer, daz awer ich oder mein erben der Samnung vngvtleichen enteten an dem vor genantem gv^et, so schol in mein herr der Herczog hintz mier vnd hintz meinem erben pezzern, als zeitleich ist. Dar vber offen ich, daz mier der Abbt vnd dev Samnung dacz Pavmgartemperg durch den grozzen lieb, di si zv mier habent, gelobt habent zesprechen auf des heiligen Chroeutz alter tegleichen ein Mess von vser (sic) vrowen zehail vnd zetroest mir vnd der vorgenanten vrown Elspeten meiner havsvrowen vnd allen vnsern vordern, vnd vber die red all, die hie vor an disem brief verschriben ist, offen ich mer: Ist, daz ich mich des bedench, daz ich daz vorgenant gu^et dem vorgenanten gotshavs wil auz wegseln, so schol ich dem Gotzhavs geben innrlands vnd in v°r(bar) ein aigen, daz als gv^et ist als diez vnd daz den vorgenanten dinst wol getragen mag. Ist awer getan, daz dev wandlung nicht erget, die weil ich leb, so schol furwaz dev vorgenant Samnung vmb daz vorgenant gv^et weder von meiner havsvrowen noch von vnser paider Erben dehainn widerwegsel nicht nemen. Vnd darvmb, daz disev red stet vnd vnzeprochen bleib, so gib ich vnd die vorgenant mein havsvrow dem vorgenantem Gotzhavss disev hantvest versigelt mit meinem insigel vnd meins swechers hern Ottens von celkkin vnd mit meines geswein insigl hern Jasen (sic) von Cappell zv einem ewigen v^erchund. Der prief ist gegeben, do van Christes gepu^erd ergangen warn drevzehen hvnderd Jar vnd dar nach in dem sibenzehen Jar an sant Jacobstag.

Source Fulltext: OÖUB 5 (Wien 1868) S. 195-196, Nr. 197