Nos frater Chunradus dictus Abbas et Conuentus monasterij in Paumgartenperg Cisterciensis ordinis tenore presentium profitemur, quod Serenissimus dominus Fridericus dei gratia jllustris Romanorum rex semper augustus fauore sev gratia nos prosequens speciali gratam nobis de regali munificentia elemosinam contulit, centum videlicet libras denariorum Wiennensium nobis in muta sua Lintze vicibus ac terminis in literis eiusdem regis expressis liberaliter ordinando sub condicionibus infra scriptis. In primis itaque nos pro conpensatione tanti beneficij ad hoc fide presentium obligamus, quod in vno sacerdote nostrorum aucto numero sacerdotum missam vnam cottidie jdem sacerdos vel alter, qui fuerit ebdomadarius misse eiusdem perpetuo dicere debeat pro salute memorati regis ac fratrum suorum jllustrium ducum Austrie in vita illorum pariter et post mortem. Cui etiam sacerdoti fratri scilicet conuentualj cottidie per nos debet in speciali pitancia prouiderj. Insuper anniuersarium patris sui beate memorie domini Alberti magnifici quondam Romanorum regis ac jnclite matris sue domine Elysabet ac ipsius dominj friderici tenemur singulis annis die ad hoc conpetenti deputato cum vigiliis, missarum suffragiis omnibusque aliis, que ad hoc requiruntur sollempnitatibus peragere et deuotione debita celebrare. Preterea promittimus, quod, dum predictas centum libras denariorum integre perceperimus et fuerimus assecuti, extunc pro eiusdem summa pecunie decem librarum redditus, vbicunque in districtibus Austrie occurrerint, pro usibus nostris perpetuis emere et conparare tenemur de predicti regis ac fratrum suorum concessione et licentia specialj. in quorum omnium et singulorum premissorum perpetuam memoriam sepedicto regi has dedimus litteras sigilli nostri munimine roboratas. Actum et datum anno domini m°. cc°c. xxij°. quinto nonas marcij.

Source Fulltext: OÖUB 5 (Wien 1868) S. 318-319, Nr. 327