Ich ofmey hern Ludweigs hovsvrowe von Celking vergich offenlich vnd tvn chunt alle den, die disen prief an sehend oder ho^ernt lesen, daz ich durch got vnd durch meiner sel willen ze eim ewigen sel geraet gegeben han ze der zeit, do ich daz wol getv^en macht, vnser vrowen vnd dem Gotshavs vnd der Samnvng datz pomgartenperig vnversprochenlich aller meiner erben meins rechten chauf aigens dev drev tail vnd alle den dienst, den ich gehabt han mit aller vordrvng auf dem hof an dem Tannehof ledichleich versucht vnd vnversu^echt mit alle dem recht vnd mit dem satzze, den ich darauf gehabt han, bestetiget mit meins Swehers bestetigung hern Hartmv^ets von dem Stayn, vnd offen auch daz, daz der selbe hof dev drev tail sein recht chauf aigen gewesen ist, also hat er mir in ingeantwurt vnd dar zv auf dem selben hof drev vnd dreizzich phvnt wienner phenning ze einem rechten satz, den ich inne gehabt han in nv^etz vnd in rechter gewer mer danne dreizzich iar vnd darzv iar vnd tach on allen chriech, also antwu^ert ich in den vorbenanten herren, also er in gechauffet hat von vlreichen dem chvrtzen havser, daz ein rechtev lantgewizzen ist, vnd swanne ich nicht mer pin, daz got vber mich gepevtet, so sullen mein di selben herren von dem selben gu^et gedenchen mit ainem ewigen iartag in dem Chloster vnd mit ir tegleichem gepet als zwisschen vns daz e verlubt ist. Dar vber, daz disev red stet vnd vnzerbrochen beleib, gib ich dem vorgenanten Gotshavs vnd der Samnvng disen prief bestetiget mit des vorgenanten hern Lvdweigs meins wierts jnsigel ze einem waren vrchu^end, der diser sach gezevg ist, wand ich selbe nicht jnsigels han. Des sind gezevg her jans von Chappelln, her vlreich von Grv^enburch, her alber vnd her Hadmar von volkenstorf, her Herneid von Chvlevb, her vreitel von winthag, her Chunrat von Mitterberch, Heinrich von ympzing, Wetzel von Erbing vnd dar zv ander pidber leut genuch. daz ist geschehen, da von Christs gepv^erd ergangen waren, drevtzehen hvndert iar, dar nach in dem drev vnd zwaintzgistem iar, des Mittenchs (sic) in der ersten gantzen vast wochchen.

Source Fulltext: OÖUB 5 (Wien 1868) S. 348, Nr. 355