Ich Chunrad havser vergich offenleich vnd tv^en chunt alle den, die disen prief an sehend vnd ho^ernt lesen, daz ich ze der zeit, do ich daz wol getv^en macht, mit wol verdachtem mv^et vnd mit gesamtem rat vrowen agnesen meiner hovsvrowen vnd mit gu^etleichem willen aller vnserr pederr erben meins rechten vreyn aygens, daz mich an gevallen ist von mein prv^edern ze rechter fu^erzicht getailet den halben hof datz Eitzendorf, den der zendel von vns gehabt hat, gegeben ledichleich han ab meiner sel ze einem ewigen selgeret sechzig phenninch gelts, vnserr vrowen dem Gotshaus vnd der Samnvng datz Pomgartenperg mit aigenschaft vnd mit alle dem recht, als ich in han inne gehabt versu^echt vnd vnversu^echt vnversprochenleichen in rechter aigens gewer, vnd pin ich vnd alle mein erben des selben gu^ets des vorgenanten gotshavss vnd der Samnvng vnd swer daz selbe gu^et von in hat, gewer noch landsrecht, swo (in) des not geschieht mit ansprach, vnd swaz in dar an abgieng oder swelhen schaden siv des nemen, daz sullen sev haben auf alle dem gu°t, daz ich vnd alle mein erben haben in dem land ze osterreich, versu^echt vnd vnversu^echt on alle widerred. Daz disev red vnd mein selgeret stet vnd vnzerbrochen hin furbaz beleib, gib ich dem vorgenanten gotshavs vnd der Samnvng disen prief bestetiget mit meim jnsigel ze einem ewigen vrchvnd vnd ze einem waren gezevg. des sind auch gezevg her Jans von Chappellen, her vlreich von Grv^enburch, Her alber vnd her Hadmar von volkeynstorf, Her Ott vnd vlreich mein prvder die havser, Her Hertneid von Chvlevb, Her vreytel von Winthag, Her Chunrat von Mitterberch, Hainreich von ympzing, Hainreich, wetzel vnd Marquart von oerbing, Chunrat, Tanquart vnd Marquart die Lempel vnd dar zv ander erber Leut genuch. Daz ist geschehen vnd ist der prief gegeben, da von Christes gepv^erd ergangen waren drevtzehen hvndert iar, dar nach in dem drey vnd zwayntzgisten iar des Svntages vor Mitter vasten.

Source Fulltext: OÖUB 5 (Wien 1868) S. 350, Nr. 357