Ich Hadmar von Volckennstorf vergich offenwar vnnd tuen kundt allen den, die disen brief sehennt oder ho^erennt lesen, das jch mit wol bedachtem Muet vnd mit aller meiner Erben guetlichem willen zu der Zeit, da jchs wol getuen mocht, geben han zu einem Ewigen Seelgeret dem Gotshaws vnd der Samnung zu Pawngartenperg meins Rechten freyen Aigenns ainen hof haisset der Widerhof vnnd ist gelegen in Krewtzer pfarr vnd dient jerlichen viertzehen Schilling Newer phenning an Sand Gilgentag mit allem vnd darzu geho^ert ze holtz vnd ze veld, es sey versuecht oder vnuersuecht oder wie es genannt ist mit all dem Recht, vnd ich in jn nutz vnd in Rechter Aigens gwêr vntz her han bracht vnd der mit Rechter fu°erzicht getailt ist von meinem brueder herrn Albern von Volckennstorf vnd von allen seinen Erben mit so beschaidner Red, das der Abbt vnd die Samnung darumb vessenn vnd mich nemen sullen, wann das ist, das got v¨ber mich pewtt, So ich stirb zwischen der Traesn vnd der Trawn mit Irer fuer mit jren poten, vnd sullen mich nach irs ordens gewonhait Erlich zu der Erd bestatten vnd sol der Abbt an dem selben tag vnd fu°erbas ewigklich an meinem Jartag dem Conuennt in das Refennt geben ein gantzen dienst sam gewonhait ist jn irem ordenn. Ich sol auch vnd all mein Erben des Egenannten hofs des vor geschriben gotzhawss vnd der Samnung gwêr sein fur all ansprach, wo das not geschiecht nach Lannds Recht in o^esterreich. Vnnd darumb, das dise Red sta^et vnd vnzebrochen beleib, gib ich dem Gotshaws vnd der Samnung ze Pawngartenperg disen brief zu einem Ewigen vrchundt versigelten mit meinem anhangunden Innsigl vnd darzu mit meiner baider Sun Jnsigeln Jansen vnd Chunradts zu ainer ganntzen sicherhait. Der brief ist geben Nach Crists geburd vber drewtzehen hundert Jar vnd darnach in dem Ains vnd viertzigisten Jar ann Sannd Jo^ergentag.

Source Fulltext: OÖUB 6 (Wien 1872) S. 375f., Nr. 371