Ich Hartmut, jch Fridrich, jch harmut vnd jch hainreich die fleischessen verjehn offennlich vnnd tuen kundt allen den, die disen brief sehent oder ho^eren lesen, das wir mit wol bedachtem muet vnd mit guetlichem willen aller vnnser erben, wie die genant sind, verchaufft haben lediclich vnnsers Rechten Erbaigenns ein lehn zu Cholwing vnd waz darzu geho^ert zu holtz vnd ze veld, versuecht vnd ' vnuersuecht, das fraw Eisal von vns gehabt hat vnd jre Kind, das vns angeuallen ist von vnnserm Ohaim herrn Vlrichen von dem Stain, dem got genad, Abbt Reicharten vnd dem Conuent datz Pawngartenperg vmb ain vnd dreissig phund wiener phenning, der wir gantz vnd gar bericht vnd gewert sein mit also beschaidner red, das wir vorgenant vleischessen vnd vnnser Erben des vor genanntn guets des gotshawss vnd des Conuennts datz Pawngartennperg Gwer sullen sein, wo in das not geschiecht nach lannds recht in osterreich. Vnd was in daran abgieng, das sullen Sy haben auf allem dem gut, das wir haben jn dem Machlannd mit vnnserm guetlichen willen an als geuer. Vnd darumb, das dise red vnd diser kauf sta^et vnd vnuerkert beleib, geh wir Ich hartmut, jch fridrich, jch hartmut vnd jch hainreich die Fleischessen dem offt genannten Gotshaws zu Pawngartennperg disen brief mit vnnsern anhangunden Innsigeln zu einem sichtigen waren gezewg diser Sach. Der brief ist geben, do von Crists geburd waren erganngen Tausent jar,. dreihundert jar vnd darnach in dem Ains vnd viertzigisten Jar.

Source Fulltext: OÖUB 6 (Wien 1872) S. 398f., Nr. 395