Ich Chuenrat von Jewtenndorf vergich offenlich vnd tuen kundt allen den, die den brief sehent oder ho^erent lesen, das ich mit wol bedachtem vnd mit guetlichem muet vnd willen meiner hausfrawen frawn Ursula vnd vnnser beder Erben vnd meins brueder Bernolts geben han ein Aigenschaft gelegen datz Jewtenndorf, der ist subenthalb Jewch ackhers vnd ein krautgartt vnd ein halbe hueb, durch mein vnd meiner Vodern Seel willen hintz Pawngartennperg den herren zu jrem Chamer Ambt, die ich han abgekaufft von den Edln herrn hern Sigharten vnd hern Chunraten den hawsern, von den ich dasselb guet Emaln ze Rechtem lehen han gehabt, also beschaidennleich, das ich vnd all mein Erben hinfürbas dasselb guet sullen haben ze Rechtem lehn vonn dem vor genannten Gotshaws vnd sullen auch davon dienen järlich zu der hcrren Chamer Vier und tzwaintzig phenning an Sand Michelstag vnuerzogennlich ze Rechtem Purckrecht, als purckrechts Recht ist vnd nicht mer. Vnd darumb das die Red stet vnd ganntz vnd vnuerkert beleib, darüber gib ich vor genannter Chuenrat von Jewtenndorf dem Gotshaws zu Pawngartennperg die hanndtvest versigelt mit meinem anhangunden Innsigel vnd mit meins brueder Bernolts Innsigel, der der Sach damit gezewg ist. der Brief ist geben nach Crists Geburd drewtzehen hundert Jar vnd darnach in dem Sechs vnd viertzigistenn Jar an Sannd Lorenntzen tag.

Source Fulltext: OÖUB 6 (Wien 1872) S. 557f., Nr. 551