Ich Chunrat von Tiernstain vnd jch Kathrey sein hausfraw wir verjehen offennlich an disem brieff, das wir mit vnnser Erben gueten willen vnd gunst, mit gesambter handt zu der zeit, da wir es wol getu^en mochten, verkaufft vnd geben haben den Erbern geistlichen herren dem Abbt vnd dem Conuennt gemain jn dem closter zu Pawngartennperg alles das recht, das wir gen jn haben gehabt auf dem halbn hof gelegen ze o^etzestorf, do die lebjnne vnd ire chinder aufgesessen sind, vmb Subentzehen phund wiener phenning, der wir gar vnd genntzlich gewert sein. Vnd sullen auch wir noch all vnnser Erben fürbas auf denselben hof vnd auf allev dev, vnd darzu geho^ert khain Ansprach noch vordrung Nymmer mer gehaben, Wenig nochvil. Des zu vrchund geben wir jn disen brief versigelt mit vnnserm Innsigel vnd mit meins vettern Innsigel hern Tursen von Tiernstain, der diser Sach gezewg ist mit seinem Innsigel. Der brief ist geben zu Wienn nach Crists geburd drewtzehen hundert iar, darnach in dem funff und viertzigisten jar des nagsten samstags vor sand thomans tag.

Source Fulltext: OÖUB 6 (Wien 1872) S. 533, Nr. 528