Wier Apt Reynhart ze Pavngartenperig vnd di sampnvng gemain daselbs wier veriechen, daz di erber wrow wrow Chunigunt Jansen des richter ze Sand Polten wytibe fu^er vnsern chellner hern Piligreim vnd fu^er vnsern hofmaister hern Stevphann cho^em in ainem rechten etayding, da ier tag hin gegeben ward, da sev sazzen an vnser stat an vnserm perchtayding, daz wier haben ze Nevnburch Chlosterhalben, zegegen dem statrichter vnd dem rat allen vnd den perchgenazzen vnd vo^erdert da ain gewer eins weingarten, des wier recht grvntherren sein, des zwai drittail ains ganczen jeuchs ist, leit an dem Aychweg zenast des Chrevczer weingarten, den ier egenanter wiert Jans gechauft hiet vmb sein aigenleich ledig gu^et, ze verseezen, zeverchauffen vnd geben, swem er wolt, mit gu^eten v^erchu^enden seiner brief, bestett mit vnsers seligen herren pischof Albrechts insygel von Pazzawe vnd auch bestett mit seiner vorgeben insygel, Vnd hiet auch ier den selben weingarten bestett vnd geben ze der zeit, do er iz wol getu^en mo^echt, mit den selben v^ercu^eunden vnuersprochenleich ze rechter morigengab mitsampt auderm gut, swie di genant sind, fu^er drey hvndert phvnt wienner pfenning ze verchavffen vnd ze verseczzen vnd geben, swem si well, an allen chrieg. Ez hiet auch der vorgenant Jans ier wiert vnd wrow Chvnigunt sein hauswrow den selben weingarten herpracht vnuersprochenleich in nvcz vnd in gewer mer dann recht tag vnd pat vrogen, waz recht wer. Da ward ier ertailt mit vrog vnd mit v^ertail vnd mit rechten recht von dem ra^et vnd von den perchgenazzen in ainem rechten etayding, wir solten wrowen Chunigunten ier gewer scherm, alz perchtrechts recht ist vnd alz ier v^erchu^end sagt. Vnd daz haben wier getan noch des rats rat vnd der perchgenazzen vnd alz vrog vnd v^ertail gegeben hat, vnd haben sei desselben weingarten an rechtev perchrechts gewer gesaczt vnd gewaltig gemacht fu^erbaz allen iren frvm domit ze schaffen, verchauffen, verseczen, geben, swem si well, ier daz allerpeste fu^egunt ist. Vnd daz di voruerschriben red vnd wandlung also geschehen sein vor vnsern amptlauten vnd fu^erbaz stet vnd vnczebrochen beleib, des sein wier gezeug an vnser amptlavt stat mit vnserm an hangundem jnsygel. Der brief ist geben des mantags noch vnser Wrowen tag ze der Schydung, do man zalt von Christes gepu^erd drevzechen hvndert jar, darnach in dem a^echt vnd vierczygistem jar.

Source Fulltext: OÖUB 7 (Wien 1876) S. 61f., Nr. 67