Ich Herweig der holtzer vnd jch Margret sein hausfrau veriehn offenwar vnd tuen kundt, das wir durch rechter ehafter not willen verkaufft haben vnnsers rechten freyen aigenns ein hofstat datz Eytznndorf gelegen in Sa^echsner pharr mit alle, vnd darzu geho^ert ze holtz vnd ze veld versuecht vnd vnuersuecht, den erbern herren vnd dem gotshaws zu Pawngartenperg vmb ein genants gu^et, des wir ganntz vnd gar gericht vnd gewert sein. Vns hat auch die vor genannt hofstat iarlich nicht mer gedient dann drew huener. Vnd darumb, das die red stêt vnd vnuerkert beleib, darüber gib ich den egenanten herren vnd dem gotshaws zu Pawngartenberg den brief versigelten mit meinem anhangunden innsigel vnd mit herren lorenntzen innsigell des O^eder, der zu der Zeit Lanndtrichter was in dem Machland, der der sach vnd des kauffs damit gezewg ist. Der brief ist geben nach Christ geburd drewtzehen hundert jar, darnach in dem suben und viertzigisten jar an sand Lucein tag.

Source Fulltext: OÖUB 7 (Wien 1876) S. 37f., Nr. 39