Ich Gerunch der Mitterkircher vergich offenwar vnd tu^en kundt allen den, die den brief sehent oder ho^erent lesen, das ich mit wolbedachtem mu^et vnd mit guetlichem willen meiner hausfrawen frawn diemuetn vnd mit gunst aller vnnser erben, wie di genant sind, vnd auch durch rechter ehaffter not willen versatzt han meins rechten erbaigens, das ich mit rechtem recht in mein gwalt bracht han vnd cho^emen ist, ain lehen datz weisching, da Hainrich der Lutlan aufsitzt, gelegen in Mitterchircher pharr, dem abbt vnd dem gotshaws zu Pawngartnperg vmb viertzig phund wiener phenning, der ich gantz vnd gar gewert pin, mit allen den rechtn vnd nutzen, die darzu geho^erend ze holtz vnd ze veld, versuecht vnd vnuersuecht. Es dient auch das selb lehn ja^erlich achtzehn metzn korns vnd sechtzehen metzn habern vnd drey schilling wiener phenning an sand Jo^ergentag. Es ist auch des vor genantn lehens losung ja^erlich in den pfingstfeirtagen vnd zu kainer zeit nicht mer in dem jar. Ich bin auch vnd mein vor genannte hausfraw vnd vnnser baider erben des egeschribenn lehens vnd des satzs gwer, wo des durfft geschiecht, nach lannds recht in O^esterreich, als satzs recht ist. Gieng aber dem gotshaws vnd den herren ze Pawcngartnperg daran icht ab mit recht, das sulln die herrn vnd ir gotshaws haben auf aller der hab, die wir haben in dem land zu O^esterreich. Vnd darumb, das die red vnd die aandlung sta^et vnd vnuerchert beleib, darüber gib ich dem gotshaws vnd den offt genanten herren den brief versigelten mit meinem anhangunden innsigel vnd mit herrn Lorenntzn innsigel ze den zeiten landtrichter in dem Machlannd vnd mit herrn Wetzls innsigel von Erwing vnd mit herren Herworts innsigel den Lenperger vnnd mit Fridrichs des Tannpekhen innsigel, di der sach damit gezewg sind. Der brief ist geben nach Crists geburd drewtzehen hundert jar vnnd darnach in dem newn und viertzigistenn jar des nagstenn mittichen nach aller heiligen tag.

Source Fulltext: OÖUB 7 (Wien 1876) S. 147f., Nr. 148