Ich Anna herrn Fridrichs witib des Redler von Sichtenberg vergich offenwar an dem brief vnd tu^en chund allen den, die in ansehent lesent oder ho^erent lesen, das ich meines vetterlichen erbs, das mich ist angeuallen zu rechter fürzicht getailt von allen meinen geschwistreiden ynd das mein freis aigen gewesen ist, mit aller meiner erben guetlichem willen vnd nach meiner bessten frewndt rat versatzt han dem gotzhaws ze Pawngartenperg die güeter, die hie benannt sind, datz Topl zway lehn, am Wintposs ain lehn, an der Pruck ain hofstat, ein mu^el, die haist die geschriben mu^el, datz Fuert zway guet, auf ainem sitzet Janns auf dem andern sitzet Fridreich der La^ernhawser, an der Pruckh ein hoffstat, do Chunrat aufsitzt, die güeter alle han ich versatzt dem gotshaws zu Pawngartennperg fu^er zwaintzig phund vnd hundert phund wienner phenning, der ich ganntz vnd gar gewert bin zu rechten ta^egen an allen schaden. Es ist auch desselben satzs jêrlich lesung an sand Lorenntzntag. Ich bin auch vnd mit mir mein swager her Jo^erg von Gotzestorf desselben satzs gwer fur all ansprach alls satzes recht vnd lannds recht ist jn O^esterreich, vnd was dem gotshaws daran abgieng mit recht, das sol der abbt vnd di samnung daselbs haben auf aller der hab, die wir haben oder gewinnen in dem lannd zu O^esterreich, wir sein lebentig oder tod. Darumb das die red fu^erbas sta^et vnd vnuerchert beleib, hab ich vor genante fraw Anna den brief besigelt mit meins swager hern Jo^ergen von Gotzestorf anhangunden jnnsigel, wann ich selben aigens jnnsigel nicht enhan. Darzue han ich gebeten die edlen herren von Cappellen, herrn Vireichen vnd hern Eberharten zu zeug mit jren jnnsigeln. Vnd sind auch gezewg die erbern ritter her Vlrich von Sa^echssndorf Magens sun, vnnd herr Bernhart der druchsa^ess von Reicherstorf vnd her Chunrat von Frewntzhausenn mit jrenn anhanngunden jnnsigeln. Der brief ist geben nach Christi geburd drewtzehen hundert jar, darnach in dem sechs und funffzigisten jar an vnnser frawentag zu der liechtmess.

Source Fulltext: OÖUB 7 (Wien 1876) S. 433f., Nr. 426