Ich Ott der Lengawer vnd jch Gedrawt sein hausfraw verjehen offenwar vnd tu^en chundt allen den, die den brief sehent lesent oder ho^erent lesen, das wir mit wol betachtem mu^ot vnd mit aller vnnser erben guetlichem willen vnd nach vnnser bessten frewndt rat durch ehaft not versatzt haben dem abbt vnd der samnung ze Pawngartenperg vnnsers freyen aigenns zway gueter gelegen in Mitterchircher pfarr vnd haist das ain an der Prantstat das annder datz Ganng, vmb dreissig phund alter wiener phenning, der wir gantz vnd gar gewert sein. Vnd desselben satzs ist ierleich losung an sand Jo^ergntag vnd an chain tag nicht mer. Wir sein auch desselben satzs ir gwer als satzs recht ist in dem land ze O^esterreich. Gieng in daran icht ab mit recht, was sy des schaden nement, das sullen sy haben auf aller der hab die wir haben in dem land ze O^esterreich, wir sein lebentig oder tod. Darumb das den erbern geistlichen herren dem abbt vnd der samnung ze Pawngartnperg die red vnd die wandlung von vns vnd von vnnsern erben nach vns sta^et vnd vnuerchert beleib, so gib ich vorgenanter Ott der Lengawer dem abbt vnd der samnung den brief zu einem vrchund der sach versigelten mit meinem anhangunden innsigel, vnd zu einem zewg mit meins ohaims Leutolds von Stainrewtt anhangunden innsigl jm an schadn. Nun han ich vor genante Gedrawt Ottens des Lengawers hausfraw gebeten meinen herren hern Eberharten von Cappellen vnd meinen ohaim Otten den O^eder, der zu den zeiten lanndtrichter was in dem Machlannd, das sy auch jre jnnsigl an den brief hienngen zu einem zewg der sach douon, das di vorgeschriben gueter mein morgengab sind gewesen von dem vorgenanten Otten mein wirt. Vnd sol ich vnd auch all mein erben nach denselben guetern fu^erbas nymmer mer dhain ansprach noch zuuersicht haben dann als vil, ob wir sy lo^esen wolten fu^er die vor genannten dreissig phund phenning. Der brief ist geben an erichtag nach mittuasten noch Christs geburd drewtzehen hundert jar darnach in dem sechs und funfftzigistenn jar.

Source Fulltext: OÖUB 7 (Wien 1876) S. 443f., Nr. 438