Ich Dietrich der Flusthart zu den zeiten mu^ensmaister ze Wienn vnd ich Elspet sein hausfraw vnd vnnser erben wir verjehen vnd tu^en kundt allen den die disen brief lesent oder ho^erent lesen die nu lebent vnd hernach kunfftig sind, vmb die zway phund wiener phenning gelts purckrechts die wir gehabt haben auf der mu^el gelegen bey Gumpendorf an der Wienn zwischen der chirchen mu^el vnd der mu^el die weiln Petreins von Scho^ennkirchen gewesen ist, das wir dieselben zway phund gelts purckrechts ab der vorgenanten mu^el recht vnd redlich zu lo^esen vnd ze kauften geben haben den erbern geistlichen herren abbt Christan vnd dem conuent gemain des closters zu Pawngartennperg vmb zwaintzig phund wiener phening der sy vns gar vnd genntzlich gewert habend. Vnd sagen auch wir die vorgenanten mu^el der egenanten zwaier phund gelts fürbas aller ding ledig vnd frey vnd die nicht mer dauon zu dienen also, das wir auf die vorgenanten mu^el nymmer mer chain ansprach noch vodrung gehaben noch gewinnen sullen weder vmb vil noch vmb wenig. Vnd wann auch das (wêr) das der brief den wir verlorn habn den wir vmb die vorgenanten zway phund gelts auf der egenannten mu^el gehabt haben von hern Hainreichen pfarrer daselbs zu Gumpendorf fu^erbas funden fürgetragen vnd gezaigt wurd, von wem das wa^er, der sol dann tod vnd ze nicht sein vnd dhain kraft mer haben weder vmb vil noch vmb wenig. Vnd das dise sach also sta^et vnd vnzebrochen beleib, darüber so geben wir den obgenannten geistlichen herren abbt Christan vnd dem conuennt gemain zu Pawngartennperg vnd iren nachkomen disen brief zu einem waren vrchundt diser sach versigelten mit vnserm jnnsigel vnd mit Chunrats jnnsigel des Vrbetschen meiner vorgenannten Elspeten brueder, der diser sach zewg ist mit seinem jnnsigel. Der brief ist geben ze Wienn nach Cristes geburd drewtzehen hundert jar darnach in dem su^eben vnd funfftzigisten jar an sannd Lorentzn abent.

Source Fulltext: OÖUB 7 (Wien 1876) S. 521f., Nr. 514