Ich Reinprecht von Walse vnd jch Elspet sein hausfraw vnd mit vns all vnser erben wie die genant sind verjehn offenwar vnd tu^en kundt allen den di den prief sehennd oder ho^erent lesen, das wir mit wol bedachtem mu^et vnd nach rat vnnserr diener haben verchaufft vnnsers rechten freyen aigens ainen hof vnd ain hofstat gelegen zu Eytzendorf mit allen den rechten vnd nutzen die darzue geho^erent wie die genannt sind versuecht vnd vnuersuecht, den geistlichen lewten vnd irm gotshaws ze Pawngartenperg vmb achtzig phund wiener phenning der wir bericht sein gantz vnd gar an alln schadn. Wir sein auch des vor genannten gu^ets jr gwer, wo in des durft geschiecht als aigenns vnd lanndsrecht ist in O^esterreich. Vnd darumb das die red vnd die wanndlung also sta^et vnd vnuerchert beleib, gib ich jn den brief versigelten mit meinem anhangunden innsigel vnd mit meiner diener Hannsens von Sewsnneckh vnd Chunradt von Meilenstorf anhangunden innsigeln die bei dem chauf gewesenn vnd auch des mit jren innsigeln gezewg sind. Der brief ist geben nach Christs gepurdt drewtzehen hundert jar darnach in dem acht und funfftzigisten jar des sambstags jn der erstenn vastwochen.

Source Fulltext: OÖUB 7 (Wien 1876) S. 557f., Nr. 545