Ich Hainrich vom Mairhof in Altnmarckter pfarr ze Ysper vergich offenwar vnd tu^en kunt allen den die den brief sehennd oder ho^erent lesen, das ich mit wol bedachtem muet vnd mit guetlichem willen meiner hausfrawen Agnesen vnd aller vnnser erben vnd auch nach rat vnnser bessten frewndt zu der zeit do wir es wol getuen mochten verchauft han den hof zu Herstorf der mir zu meiner vorgenannten hausfrawen worden ist zu heyratgu^ot, mit allen den rechten vnd nutzn die darzu geho^erent versuecht vnd vnuersuecht wie die genannt sind als wir jn selb gehabt haben, dem gotshaws ze Pawngartnperg von dem er vnnser lehen gewesen ist als ir brif sagend die der conuent vnd das gotshaws darüber habent, vmb viertzig phund wiener phenning der wir gantz vnd gar bericht sein an allen schaden also, das wir ich vnd mein vorgenante hausfraw vnd vnser baider erben chain zuuersicht noch chain ansprach zu dem obgenantn hof nymmer mer sullen gehaben. Wir sein auch vnuerschaidennlich desselben hofs gewer als landsrecht ist in O^esterreich. Gieng aber dem conuent vnd dem gotsahws daran icht ab vnd was sy des schaden nemend mit recht, den sullen sy haben auf aller der hab die wir haben in dem land zu O^esterreich wir sein lebentig oder tod. Vnd das die wanndlung also sta^et beleib, geb wir dem gotshaws den prief zu einem zewg vnd waren vrchundt. Vnd seind jch vorgenanter Hainreich nicht aigenns jnnsigels nicht han, verpind wir vns die wandlung sta^et zu haben hinder meins brueder jnsigel Weicharts (ze) den zeiten Hehlers ze Yspar vnd hinder meins swager jnsigel Fridreichs des Rotenmoser. des sind auch gezewg mit jren jnnsigeln Hainreich der Fleischess (ze) denn zeitenn lanndtrichter in dem Machlannd vnd Harlmu^ot sein bruder vom Stain. Der brief ist geben nach Crists geburd drewtzehen hundert jar darnach in dem süben und funfftzigistenn jar ann sannd Margrettenntag.

Source Fulltext: OÖUB 7 (Wien 1876) S. 512f., Nr. 504