Wir apt Christan cze Paumgartnperig vergehen offenbar vnd tun chund allen den di den prief sehent oder horent lesen, daz vns der erber herre her Ott von Volkensdorf nach seins vater tod di czwen ho^ef cze Chirchstegen enphalch cze stiften nach vnsern trewen vnd nach der vmsaezzen rat czu ainem genanten dienst wand si vor cze gemainem paw lagen, vnd daz hab wir getan also, daz der gro^ezzer hof ewichleich dienen schol fumf vnd viertzk metzen chorns vnd viertzk metzen habern vnd fumftzehen schilling wienner phenning; vnd der chlainer hof schol dienen vier vnd czwaintzk metzen chorns vnd czwaintzk metzen habern vnd ain phunt wienner phenning. Iz schullen auch di vorgenanten czwen ho^ef dhain witfuer (voitfuer?) noch dhain weinfuer noch dhain stekchenfuer von wald nicht tuen vnd schullen der ledig vnd frey sein, wand si in von erst nicht sind aufgesetzt; awer andrer fuer vnd allev andrev recht mit stewer mit pezzrung mit ablait mit anlait mit todrecht hab wir auf den vorgenanten ho^efen alls auf andern vnsern gutern di vmb daz gotshaws gelegen sind. Daz in di red staet beleib, geb wir in den prief versigeltn mit vnserm anhangundem jnsigel. Der prief ist geben nach Christs pu^erd drevtzenhundert jar darnach in dem siben vnd fumftzkisten jar an dem samztag nach sand Margreten tag.

Source Fulltext: OÖUB 7 (Wien 1876) S. 516, Nr. 508