Wier apt Jans und der convent gmain ze Paumgartnperg verjehen und tun chund, daz uns der erber man Ulreich der O^echgsel purger zder Freynstat umb sein aygenschaft gu^et gechaufft hat von Ottn dem Gru^eber umb zwai und dreizk phunt phening wienner munzz ain gut genant datz der Spraid gelegen in Rieder pharr, und hat uns daz geben lawterleich durch Got jem und allen seinen vo^edern und allen seinen nachkomen zu einem ewigen selgraet mit so^eleicher beschaidenhait, daz wier iem und auch seinen zwain hawsfrawn vraven Elzpeten und vraven Margreten und andern allen seinen erben und gescholen schullen begen einen jartag mit allen sachen alz gwo^endleich ist in unserm orden, jaerleich an dem achteden tag nach sand Jacobs tag, und an dem selben tag schol man von der abtey, wer unterchellner ist, von ainem phunt phening geben den herren in daz refent ein mal mit vischen und mit wein alz man von andern erbern laewten tu^et die jartag datz in gestifft habent. Wier schullen auch oder wer nach uns herr und apt ist seinem vetern pru^oder Merten unserm munich von unserr bu^ersen raichen jaerleich an sand Michels tag ain phund phenning oder wann er sein du^erftig ist, die weil und der vorgenantt pru^oder Mert lebt, und wann er nimer ist, so ist daz vorgeschriben phunt phenning daz man iem raicht der aptey ledig und schol man nichtz mer jemand davon geben. Waer awer wier daran savmig und dem obengenanten pru^oder Merten daz phunt phening nicht raichten oder den jartag nicht begierigen alz oben an dem prief geschriben stet mit dem mal und mit allen sachen, zehant so schol sich der vorgenant Uelreich O^echgsel und nach iem sein naegst erben oder wer den prief inne hat dez vorgeschriben gu^etz underwinden und daz alz lang inne haben untz daz die savmchait von uns wol wizzenleich gepessert werd, damit so ist uns daz gu^et wider ledig alz ee. Daz die red staet und unczebrochen beleib dez geben wir iem zu einem ewigen u^erchund den offen prief versigelten mit unsern paiden anhangunden insigelen, der geben ist an dem samstag nach dem heyligen ostertag, do man zalt von Christes gepu^erd dreuczehen hundert jar und in dem ains und sechtzkistem jar.

Source Fulltext: OÖUB 8 (Wien 1883) S. 9f., Nr. 9