Ich Kathrey des Chunrats des Morbeckenn tochter von Stafflern und mein wirt Hans Chunrats des müllner sun am Steg und mit uns all unnser erben wir verjehen, das ich recht und redlich ze kauffen han geben mein rechts va^etterlich erb das kaufrecht an dem hof datz Stafflern, das ich gehabt han vom gotshaws ze Pawngartennperg, meinem genedigen herren abbt Jansen zu der zeyt abbt des vor genannten gotzhawss ze Pawngartennperg und der samnung gemainclich daselbs, umb ein benants gelt des ich ganntz und gar gericht bin zu rechten ta^egn und an all schedn. Ich bin auch des egenanten kaufrechts ir recht gewer nach des lanndes recht in O^esterreich also beschaidennleich, was in an dem offt genannten chaufrecht abgeet oder daran irrung oder chrieg auferstet mit dem rechten von anndern mein erben, und auch all den die des obgenannten hofs wellent erben sein wie die genannt sind, wie getann schaden sy des nement den ir ainer bey seiner gewissen gesprechen mag oder ir anwalt bey seinen trewen sunst ungestritten, denselben schaden alln sullen wir in ich obgenannte Kathrey und ich Hanns ir wirt und ich Chunrat der müllner am Steg und ich Mertt des egenanten Hannsn bru^oder alles ausrichten und widerkern an alle widerred und an alles recht, und sullen sy das haben datz unnsern vorgenannten trewen unverschaidennlich darzu datz aller unnser hab, die wir haben im lannd zu O^esterreich. Und wann wir selb nicht aigen innsigell haben, darumb geben wir in den brief versigelt mit unnsers genedigen lieben herren hern Eberharts von Chappellen zu der zeit haubtman zu Ens anhangunden innsigell, darunder wir uns obgenant all verpinden mit unnsern trewen an aides stat fu^er uns und fu^er alle die die zu dem egenannten hof wellent erben, dafu^er wir uns unverschaidennlich haben angenomen alles das ze ennden und zu richten das vor an dem brief geschriben ist. Des ist auch gezewg der erber man Hainreich der Schaffer zu der zeit lanndtrichter im Machlannd mit seim anhangunden innsigel, der geben ist an sand Margretn tag nach Cristi geburd drewtzehen hundert jar darnach im sübn und sechtzigistenn jar.

Source Fulltext: OÖUB 8 (Wien 1883) S. 329f., Nr. 337