Wir abt Jans und der convent gemain ze Paumgartnperg verjehen, daz wir durch di besunder gnad und gro^ezz triw^e und lieb di der erber herr her Eberhart von Chappelln haupmann ze Ens zu uns und zu unserm chloster hat, all mit gemain rat unsern willen und gunst darzu haben geben daz er daz wazzer hat genumen in der Ayst ob unser mul genantt die geschriben mul gelegen an der Ayst, und hat daz selb wazzer gefu^ert gen Noerden in sein weyr und schol auch er und all sein erben denselben wazzerganch also ewikleich haben und da sullen wir und all unser nacho^emen noch ander ny^emand von unsern wegen sev an irren und sullen auch sev dar umb hin fu^er nimmermer dhain zuspruch noch inwurf von uns und von allen unsern nacho^emen gehaben noch gewinnen ewikleich. Dez ze u^erchund geben wir in den offen prief besigelt mit unseru payden anhangunden insigeln. Geben nach Christi gepu^erd dreutzehen hundert jar und in dem acht und sechtzkisten jar an sand Gilgen tag.

Source Fulltext: OÖUB 8 (Wien 1883) S. 394, Nr. 397