Allen den, die disen bref^a) an sehent oder horent lesen, kunden wir swester Adilhaid e^abtischen vnt^b) der conuent gemainlich ze Tennikon¹ ain erkant||nust der nachgescriben dinge. Wissen alle, den es ze wissenne beschiht, das vns der erber man herre Wernher von sant Gallen² durch siner sei vnt || siner wirten vro Belun³ sei hailes willen gegeben hat du gu^eter, du hie nach gescriben stant, du er ân allen vnser schaden geko^vft vnt vns gevertegot hat, || Obern Hofsteten⁴, Hillispach⁵, das Krieg gůt, der Traber⁶ zehenden, Hungenwile⁷, den wingarten an dem stutze ze Stetfurt⁸, den wingarten ze Humbrehtspu^el⁹ vnt die acker, die dar zů ho^erent, ze niesenne nach ir beder tode mit solicher ordenunge. Von dem zinse, den du vorgenemten gu^eter geltent, suln wir vnserm conuent geben jerglich funf pfunt Costencer, du sint also geordenot, in der zůkunft suln wir gen ain pfunt vmb fische entswischen wihennehten vnt der fasnaht, ain pfunt vmb zigern, in der fastun ain pfunt vmb fische, von ostron vntz ze pfingsten ain pfunt vmb aiger vnt ze den vîer vnser vrowen tultan ze ieglicher tult vunf Schillinge pfenning Costencer, als su denne dem conuent allir liebost sint. Wir suln o^vch von den vorgenemten gu^etern je^arglich geben dem spitâl ze sant Gallen¹⁰ sexuntdrizeg Schilling pfenning Costencer, vnt beschehe das, da vor got si, das wir von lant vrluge, von hagel ald von vngewehste bresten gewunnen an dem zinse der vorgenemton gu^eter, den sol der vorgenemte spitâl mit vns tragen gemainlich. Wir son o^vch von dem vorgenemten gute ze Obern Hofsteten ia^erglich geben den Predigern in den Rin¹¹ vnt den Augustiner ze Costentz¹² siben Schillinge vnt ain pfunt Costencer, beden gelich. Wêre och das, das lant vrluge ald hagel ald vngewehste vns da schaden tête, den schaden sont su mit vns han als gewonlich ist. Er hât och also geordenot, swas wines von den vorgenemten wingarton kumpt, den son wir also tailen, das wir den vrowan ainest in der wuchun dar von pfrůnde geben, vnt swer der rebman ist, der denne die reban puwet, dem sun wir des wines pfrůnde geben als ainer vrowun. Wêre aber das, das wir die vorgenemten vrowan die vorgenanten ordenunge nit rihten, als da vorgescriben stât, so sol der zins, der von den vorgenemten gu^etern kumpt, des iares gevallen sin den ersamen in gotte vnseren herron dem conuent ze Capelle¹³, dem conuent ze Maggenowe¹⁴ vnt dem vorgenemten spital ze sant Gallen gemainlich, vnt wêre denne, das vnser herren der conuent von Capelle ir reht ab liesen, so sulte der zins alle werden dem vorgenemten convent^c) von Maggenowe vnd dem vorgenemten spital, wolte aber denne der conuent von Maggenowe sin reht lasen varn, so sol der zins alle werden ân gewer^a) dem vorgenemten spital ze sant Gallen. Beschehe o^vch das, das wir der vorgenemten gu^eter dekain es verko^vften ald versatzten ze lipgedinge ald dekainen wech, swas vns da silbers oder Pfenninge vmb wurden, das sol^d) alles werden den vorgenemten^e) vnseren herren ze Capelle, dem conuent ze Maggenowe vnd dem spital ze sant Gallen an alle gewer^a), als o^vch du vorder ordenunge sait. Och hain wir im gelobt dem vorgenanten hern Wernher, won er vns sin vlechclich dur got bat, das^f) im vnt siner wirten nach ir beder tode vnser ieglichu wuchoglich sol sprechen funf vnt driszeg pater noster vnd aue Maria. Vnd das dis war si vnt stête belibe, darumbe^g) geben wir die vorgenanden dem vorgenemten hern Wernher disen brief besigelten mit vnserem insigel ze ainem waren vrkunde. Vnd won wir êhaftiger dinge dehaines getůn mugen noch sulen ân ortfrumi vnd vrlub vnsers visitierers des erbern in gotte abt Burchartz von Capelle¹⁵, darumbe so haben wir in gebetten sin insigel geben ze dem vnsern an disen brief ze ainem geweren vrkunde^h) aller der dinge, so da vor gescriben stât. Wir brůder Burchart von gottes verhengde abt des gotzhus ze Capelle des ordens von Cyster in Costencer bistům visitierer des gotzhus ze Tennikon, wan wir erkennen, das du vorgescribenen ding von der vorgenanden e^abtischen vnd dem conuent des vorgenanden gotzhus so reht vnt so redelich besehenen sint, darumbe so haben wir dur ir bette vnser insigel gegeben zů dem im an disen briêf ze ainer ortfrumi vnt offener bezugungeⁱ⁾ der vorgescriben dinge. Dirre brief wart gegeben ze Tennikon, do man zalte von gottes geburte^k) druzehenhundert jâr, dar nach in dem nunzehenden jâre, an der nahosten mitwuchun vor sant Symon^l) vnt sant Judas tage.

Source Fulltext: Chartularium Sangallense V, Nr. 3065, S. 364-365.