Allen den, die disen brief an sehent lesent oder ho^errent lesen, tůn wir Hainrich Schaitegg, Margaretha sin elichi wirtinne, Hans, Claus vnd Els iro baider elichú || kind kunt vnd veriehent offenlich mit disem brief, das wir ellú gemainlich vnd mit enander gesworn habint gelert aid ze den hailgen mit vf gehabnen handen dem erwir||digen fúrsten Cůnen von gottes gnaden abt des gotzhus ze sant Gallen¹ vnserm gna^edigen herren an sines gotzhus statt, das wir vnsern lib noch vnser gůt dem vorgenanten gotz||hus ze sant Gallen, des recht aigen wir sint, nitt entfro^emden entflo^ehen noch entfu^eren sont weder mit burgerrecht noch mitt vogtrecht mit wiben noch mit mannen noch in kainen andren weg, den ieman kan oder mag finden ald erdenken in dehainer lay wis, a^vn geua^erd. Wa^er aber, daz wir ellú oder dehains besunder vnder v´ns daz in dehain wis v´berfúr, so so^ellent vnd sigent wir ellú gemainlich vnd vnuerschaidenlich dem obgenanten v´nserm gna^edigen herren abt Cůnen sinen nahkomen vnd dem vorgenanten gotzhus ze sant Gallen veruallen drissig pfunt pfennig gůter vnd gena^emer Costentzer múns, vnd dz selb gelt so^ellent wir vnd v´nser erben dem obgenanten v´nserm gna^edigen herren abt Cůnen oder sinen nahkomen geben vnd gantzlich vs richten indront dem na^ehston manot, nah dem vnd daz selb vorgenant gelt die drissig pfunt pfennig der vorgenanten múns von dem obgenanten v´nserm gna^edigen herren abt Cůnen oder sinen nahkomen an v´ns geuordrot wurdent ze hus ze hof ald vnder ogen mit botten ald mit briefen a^vn geua^erd, vnd habent dem selben v´nserm gna^edigen herren abt Cůnen vnd sinen nahkomen an des vorgenanten gotzhus statt zů v´ns ze merer sicherhaid ze búrgen geben die beschaiden man Haini Waibel von Obrasunbri², Hansen Giger von Amergaswil³, Hansen Stainbrunner von Amergaswil, V^olrich Bůchman von Múlibach⁴, Hainin Jeklis von Amergaswil, Hansen Stainer von Owenhofen⁵, Cu^eni Schlegel von Obrasunbri, Haini Swegler von Sunbri⁶, Cu^eni der Basen von Owenhofen, die dis búrgschaft alle gemainlich vnd vnuerschaidenlich vff sich genomen hant mit so^elicher beschaidenhaid, wa^er daz wir dem obgenanten v´nserm gna^edigen herren abt Cůn ald sinen nahkomen die vorgenanten drissig pfunt pfenning Costentzer múns nútt gebint in dem zil, als da vor beschaiden ist, so hat der vorgenant v´nser gna^ediger herr abt Cůn friges vrlob vnd vollen gewalt, die vorgenanten drissig pfunt pfenning Costentzer múns an schaden ze na^emenn vnd ze gewúnnen an cristen an juden an pfenningen an wehseln vff linwat oder an andren ko^effen, wenn wa vnd wie si es vff vnsern vnd vff vnser erben vnd vff der vorgenanten búrgen an gewonlichem schaden vinden gewinnen vnd genemen mugent ald went, vnd wie oder weles weges der selb v´nser gna^ediger herr oder sin nahkomen vnd daz vorgenant gotzhus denn des vnd da von in kainen weg ze redlichem schaden koment, si na^emint so vil gůtes an schaden, si standen darvmb an schaden oder man na^em es vff si an schaden oder si komint sin ze schaden von gsůch von pfandung von bottenlon von zerung von klag von nahsendenn von gerichtz wegen oder von dehainer ander sach wegen, von dem hopt gůt vnd von dem schaden allem sont wir vnd v´nser erben vnd die vorgenanten búrgen si gar vnd gantzlich lo^esen vnd vnschadhaft machen a^vn allen iren schaden vnd a^vn fúrzug. Dar zů hat och derselb vnser gna^ediger herr abt Cůno vnd sin nahkomen vnd iro helfer, wer die sint, gantzen gewalt vnd friies vrlob, daz si v´ns vnd v´nser erben vnd och die vorgenanten búrgen vmb hoptgůt vnd vmb schaden, das gůt stand an schaden oder nútt, anzegriffen heften no^eten vnd pfenden an allen v´nsren gu^etern ligenden vnd varenden vff dem land in den stetten vnd och in do^erfern allenthalben, wenn wa vnd wie si mugent ald wend, es si mit recht oder a^vn recht a^vn klag vnd a^vn allen zorn, als vil vnd als lang, vntz daz si des vorgenanten hoptgůtes vnd alles des schaden, so dar vf gat vnd gangen ist, a^vn iren schaden werdent gewert vnd vsgericht gantzlich vnd gar, vnd sol v´ns noch v´nser erben vnd die vorgenanten búrgen noch dehain v´nser ald der búrgen gůt ald gu^eter da vor noch da wider nútt schirmen noch gůt sin enkain frihait enkain recht gaistlichs noch weltlichs enkain puntnust noch gesetzt der herren der stett noch des landes enkain stattrecht noch lantrecht enkain gelait a^vcht noch ba^enn kain aidgnosschaft noch dehain ander sach schirm burgrecht noch fúrzug, so ieman da wider kan ald mag finden ald erdenken in dehainr lay wis, a^vn geua^erd. Vnd des vnd hier v´ber ze offem vnd warem vrkúnd aller vorgeschribner ding vnd vergiht habent wir Haini Schaitegg, Margaretha sin elichi wirtin, Hans, Claus vnd Els iro baider elichi kind mit den obegenanten búrgen erbetten den fromen vesten herr Růdolfen von Rosenberg von Zukenriet⁷ ritter des obgenanten gotzhus dienstman, daz er sin aigen insigel fúr v´ns vnd v´nser erben offenlich gehenkt hat an disen brief, won wir nútt aigner insigel habent. Darnah veriehent wir obgenanten búrgen Haini Waibel von Obrasunbri, Hans Giger von Amergaswil, Hans Stainbrunner von Amergaswil, V^olrich Bůchman von Múlibach, Haini Ia^eklis von Amergaswil, Hans Stainer von Owenhofen, Cu^eni Schlegel von Obrasunbri, Haini Swegler von Sunbri, Cu^eni der Basen, das alles das war ist, daz der vorgenant Hainrich Schaitegg, Margaretha sin elichi wirtin, Hans, Claus vnd Els iro baider elichi kind von v´ns von der obgeschribnen búrgschaft wegen an disem brief veriehen hat, vnd dar vmb das dis alles, so da vor von derselben búrgschaft wegen von v´ns verschriben stat, war vnd vnwandelber belib, so habent wir och erbetten den egenanten fromen vesten herr Růdolfen von Rosenberg ritter, daz er sin insigel fúr v´ns gehenkt hat an disen brief, won wir aigner insigel nitt habent, des och ich herr Růdolf von Rosenberg von Zukenriet ritter vergih, dz ich von ernstlicher ba^ett wegen Hainrichs Schaitegg, Margarethen siner elichen wirtinen, Hansen, Clausen vnd Elsen iro elichen kinden vnd der obgenanten búrgen Hainis Waibels von Obrasunbri, Hans Gigers von Amergaswil, Hans Stainbrunners von Amergaswil, V^olrich Bůchmans von Múlibach, Haini Jeklis von Amergaswil, Hans Stainer von Owenhofen, Cu^eni Schlegel von Obrasunbri, Haini Swegler von Sunbri, Cu^eni der Basen min aigen insigel fúr si ellú gemainlich gehenkt han an disen brief mir vnd minen erben gantzlich vnscha^edlich. Geben ze Wil⁸ in der statt am na^ehsten ma^entag vorm palmtag in dem jar, do man zalt von Cristi gebúrt drúzehenhundert jar, achtzig jar, dar nah in dem achtoden jar.

Source Fulltext: Chartularium Sangallense X, Nr. 6251, S. 483-484.