Wir^a) Cůn von gottes gnaden abt des gotzhus ze sant Gallen¹, das a^vn alles mittel zů geho^ert dem stůl ze Ro^vm, tůnd kund || offenlich an disem brief allen, die in sehent lesent oder ho^errent lesen, das fúr v´ns kam ze Wil² in vnser statt vff disen húttigen || tag, als dirre brief geben ist, vnser lieber Johans von Hardegg³ vnsers gotzhus dienstman mit Johansen Ho^ern ze den ziten bur||germaister ze sant Gallen, vnd der selb Johans von Hardegg offnot vnd veriach vor v´ns, wie das er mit gůter vorbetrahtunge disú nachgeschribnen gůt, die er von v´ns vnd vnserm gotzhus ze sant Gallen ze lehen ha^vt, das ist Hardegg das burgstal, den hof ze Loch⁴, den hof an Spilberg⁵, den hof vff der Egge⁶, den wingarten gelegen am Hurst⁷, den wingarten zer Tannen⁸, dú mad bi Rebstainer Furt⁹ mit lúten vnd gůten, so zů dem selben burgstal geho^errent, vnd darzů a^ellú die lehen, die er von v´ns vnd vnserm gotzhus ze lehen ha^vt, wie dú genempt ald wa si gelegen sint von Rinegg¹⁰ vf vntz an den Kobelstain¹¹, mit der lehenschafft mit gerihten twingen vnd ba^ennen mit aller ehafti vnd gewaltsami vnd mit allen rehten rehtungan nútzen gewonhaiten vnd zů geho^erden, so zů dem vorgeschribnen burgstal vnd gu^etern vnd zů den vorgedahten lehen geho^errent vnd geho^erren sont von reht ald von gewonhait vnd als er es vntz her inne gehebt vnd genossen hett, also hetti er das alles verko^vfft vnd ze ko^vffenn geben dem obgenanten Johansen Ho^ern vmb sehs hundert guldin gůter von gold vnd swa^er an gewiht vnd wa^eri och der selben guldin von im gantzlich gewert vnd bezalt, vnd batt v´ns mit ernst, das wir dú vorgenanten gůt vnd lehen a^ellú von im vff nemen wo^eltin vnd si lihen dem obgenanten Johansen Ho^ern ze lehen. Do erhorton wir sin redlich ernstlich bett vnd namen das vorgeschriben burgstal vnd a^ellú vorgeschribnen gůt vnd dú vorgedahten lehen mit der lehenschafft mit gerihten twingen vnd ba^ennen vnd mit allen rehten vnd zů geho^erden, als vor ist beschaiden, von dem vorgenempten Johansen von Hardegg an vnser hand vff vnd lúhent vnd lihent mit disem brief dem obgenampten Johansen Ho^ern das vorgeschriben burgstal die vorgeschribnen ho^ef wingarten vnd gu^eter vnd alle die lút, die darzů geho^errent, vnd a^ellú vorgedahti lehen mit der lehenschafft mit gerihten twingen vnd ba^ennen mit aller ehafti vnd gewaltsami vnd mit allen rehten vnd rehtungan nútzen gewonhaiten vnd zů geho^erden, als vor ist beschaiden, ze rehtem lehen mit der beschaidenhait, wa^er das sich erfund, das vnserm vorgeschribnen gotzhus ze sant Gallen vsser der vorgenanten gu^etern ainem oder mer ald allem zins oder zehenden giengin ald gangen wa^erint, daz denn disú lehenschafft vns vnsern nahkomen vnd vnserm vorgenanten gotzhus ze sant Gallen an den selben zinsen vnd zehenden der obgenampten gu^etern vnuergriffenlich vnd ga^entzlich vnscha^edlich sin sol. Vnd ist dis beschehen vnd redlich vollfu^ert nah vnsers gotzhus gewonhait vnd reht, als es krafft vnd maht haben sol vnd mag ietz vnd hienah. Vnd des alles ze offnem vnd warem vrkunde haben wir abt Cůn da vorgenampt v´nser insigel gehenkt an disen brief. Darnach vergich ich der obgenant Johans von Hardegg des obgenepten gotzhus dienstman offenlich an disem brief, das alles das war vollfu^ert vnd beschehen ist, das der erwirdig min gna^ediger herre Cůn von gottes gnaden abt des vorgenanten gotzhus ze sant Gallen von mir veriehen vnd verkúndet ha^vt an disem brief. Vnd ze merer sicherhait der selben dinge han ich och min aigen insigel offenlich gehenkt an disen brief. Der geben ist an dem na^ehsten frytag vor dem palm tag in dem jar, do man zalt von Cristi gebúrt drúzehenhundert ahtzig vnd aht jar.

Source Fulltext: Chartularium Sangallense X, Nr. 6254, S. 486-487.