Allen den, die disen brief sehent lesent oder ho^erent lesen, kúnd ich V^olrich ab Kellerberg² von Bernang³ in || dem Rintal vnd vergich offenlich mit disem brieue fúr mich vnd alle min erben, daz ich mit wolbedahtem || můt vnd gůter vorbetrahtung willeklich verko^vft han vnd ze ko^vffenn geben han reht vnd redlich dem || erbern vnd wolbeschaidenn Johansen Kaltysen burger ze sant Gallen vnd sinen erben diz nâchgenemten zwên wingarten, den wingarten, den man nemmet der Hu^enlisbach⁴, der ainhalb stosset an Hainis Tegans wingarten vnd anderthalb an Swartzzachs wingarten, der min lehen waz von dem gotzhus ze sant Gallen, vnd den wingarten, den man nemmet dez Helds wingart, gelegen ze Hasla⁵, der ainhalb stosset an hern Johansen von Zwingenstain⁶ wingarten vnd anderthalb an Swartzzachs wingarten, der min reht aigen waz, mit grunt mit grât mit allen rehten nútzzen vnd gewonhaiten vnd mit aller zů geho^erde, vmb núnzehen pfunt pfenning gůter vnd genger Costentzzer múnse, der ich gantzlich von im gewert bin vnd enpfangen han vnd an minen offenn nutz bekert an den stetten, da ich minen wahsenden schaden mit verkomen han. Vnd han im o^vch den obgenanten wingarten genant der Hu^enlisbach v^f geben vnd ze sinen handen geuertgot mit dez êrwirdigen mines gna^edigen herren hant abt Georien abt dez gotzhus ze sant Gallen⁷, vnd den wingarten, den man nemmet dez Helds wingart, der min reht aigen waz, han ich im mit allen rehten vnd mit aller zů geho^erde vf geben vnd ze sinen handen geuertgot an dez rychs strâsse, als reht sitte vnd gewonlich waz. Ich han mich o^vch willeklich verzigen vnd verzîch mich mit disem brieue gantzlich vnd gar fúr mich vnd alle min erben aller aigenschaft aller lehenschaft alles rehten aller vordrung vnd aller ansprâchen gaistlichs vnd weltlichs gerihtes, so ich vnd min erben, ob ich enwa^er, an den ald zů den vorgeschribenen wingarten hattent ald hie nâch iemer gehaben oder gewinnen mo^ehtint. Ich han o^vch gelobt mit miner trúwe fúr mich vnd alle min erben, der vorgenemten wingarten vnd o^vch dez vorgeschribenen ko^vffes wern ze sinne nâch reht gen ma^enlichem an gaistlichem vnd an weltlichem geriht vnd an allen stetten, wâ vnd wenn ald wie dik sin der vorgenemt Johans Kaltysen oder sin erben ald nächkomen bedurffent ald darumb v^f getriben ald an gesprochen werdent, an gevärde, Vnd ze ainem wären vrkúnde vnd gantzzer sicherhait aller der vorgeschribenen dinge vnd gedinge so han ich V^olrich ab Kellerberg da vorgenemt fúr mich vnd alle min erben min aigen insigel gehenkt an disen brief. Der geben ist ze sant Gallen an dem na^ehsten ma^entag vor sant Martis tag in dem jâr, do man zalt von gottes gebúrt drúzehenhundert jâr, sehszig jâr vnd darnach in dem andern jâre.

Source Fulltext: Chartularium Sangallense VIII, Nr. 4831, S. 47-48.