Allen den, die disen brief ansehent lesent oder ho^errent lesen, kúnd ich Johans von Twingestain¹ ritter vnd vergich offenlich an di||sem brief fúr mich vnd fúr alle min erben, das ich reht vnd redlich ze ko^vffen gib vnd geben han Růdolfen von Roschach kilchherren || der kilchen ze Roschach vnd Egolfen^b)2 sinem brůder vnd iren erben, ob sú enwa^erint, dis nachgenenten gu^eter, des ersten des Ho^eggers zehen||den, den man von alter nemmet des Verren zehenden, des vmbga^enten zehenden ainen vierdentail, den bo^vmgarten vnd den aker, dú da stossent an Hainis Ammans sa^eligen ho^vfstat vnd an den kelr, vnd ain ho^vfstat lit an dem selben bo^vmgarten vnd stosset an die offen stras, den aker, der da stosset an des kelnho^vfes braitun, der den kor der kilchen ze Roschach teken sol, den aker, der da lit an der Ka^eseren³, das hus vnd die ho^vfstat, die da stossent an V^elis des Bremen hus, die ho^vfstat ennent dem bach, die stosset an Cůnratz des Kressen hus, vnd dar nach alles, das ich ze Roschach han, es sie gelegen in dem selben dorf ald bi dem dorf ald vmb das dorf, es sie genent ald vngenenptz, mit allen rehten mit wasen mit zwi mit holtz mit veld mit wasser vnd mit wasser flússen vnd mit aller zůgeho^erd, als ich sú vntzint da her gehebt vnd genossen han, vmb zwai vnd zwainzig phunt gůter Costentzer phenning^c), der ich von inen gar vnd gantzlich gewert bin vnd an minen offenen schinberen nutz komen sint. Ich der vorbenent Johans von Twingenstain ritter vergich offenlich an disem brief fúr mich vnd min erben, das wir der vorbenempten gu^eter vn^b) zehenden reht wern sont sin nach reht an allen den stetten, da sin die vorbenten^b) von Roschach ald ir erben, ob sú enwa^erint, notdúrftig sint. Ich Růdolf Ho^egger vergich offenlich an disem brief, das ich mich entzieh vnd entzigen han alles des rehten vnd ansprach, so ich zů den vorgenten^b) gu^eter vnd zehenden ie gehat ald haben moht, die min gena^ediger her Johans von Twingenstain den vorbenenten von Roschach vnd iren erben ze ko^vffen geben hat, vnd entzich mich mit disem brief fúr mich vnd min erben alles rehten aller aigenschaft, so ich zů den vorgenenter^d) gu^eter hatt ald haben moht. Ich der dik benent von Twingenstain entzich mich fúr mich vnd min erben alles rehten aller kunschaft aller aigenschaft aller lechenschaft aller gewer alles rehten gaistlich vnd weltliches, so ich ald min erben zů den selben gu^etern ald zehenden ie gehat ald gehaben moht, Vnd des ze ainem waren urkúnd vnd sta^eter sicherhait aller dirre vorgeschribener dinge vnd gedinge, so hie vor von mir von dem vorgempten^b) Johansen von Twingenstain ald von minen erben an disem brief geschriben stat, so henk ich min aigen insigel an disen brief. Der geben ist ze Roschach uff der burg des jares, do man zalt von gottes gebúrt drútzehenhundert jar vnd dar nach in dem sibentzgostem jar, an der na^echsten mitwehen nach sant Cůnratz tag.

Source Fulltext: Chartularium Sangallense VIII, Nr. 5252, S. 442.