Wir die nâchgenemten Dietdegen vnd V^olrich die Maiger von Altstetten gebrůder Dietrichs dez Maigers sa^elgen von Altstetten¹ wilunt êlichen sún || tu^en kunt vnd veriehent offenlich mit disem brieue fúr v´ns, fúr Růdolf von Altstetten² v´nsern brůder vnd fúr alle v´nser erben allen, die in anse||hent lesent oder ho^erent lesen, daz wir mit gůter vorbetrahtung vnd mit ainberem willen daz gůt, daz man nemmet die mitlosten Grindel³, gelegen || ze Altstetten vnder Warmans Berg⁴ vnd stosset ainhalb an den Buggenberg⁵ mit allen rehten nútzzen vnd gewonhaiten vnd mit allem dem, so von reht ald von gewonhait darzv^o vnd darin geho^ert, redlich vnd reht verko^vft vnd ze ko^vffenn geben habent dem beschaidenn kneht Hainrich dem Zigen von Altstetten vnd sinen erben, ob er enwa^er, vmb drú phunt ân fúnf schilling phenning gůter vnd gena^emer Costentzzer múnse, der wir gantzlich von im gewert sigent vnd enphangen habent vnd an v´nsern vnd v´nser geswistrit gemainen nutz bewendet, daz selb vorgeschriben gůt v´nser reht lehen waz von dem êrwirdigen gotzhus ze sant Gallen, dannen wir im o^vch daz selb vorgeschriben gůt mit allen rehten vnd mit aller zv^o geho^erde reht vnd redlich geuertgot vnd zv^o sinen handen brâht habent, alz reht sitte vnd gewonlich waz vnd alz ez kraft vnd maht sol vnd mag han. Vnd darumb so habent wir v´ns willeklich verzigen vnd verzihent v´ns mit disem brieue gantzlich vnd gar fúr v´ns, fúr den vorgenanten Růdolf v´nsern brůder, fúr a^ellú v´nserú geswistrit vnd fúr alle v´nser erben dez vorgeschribenen gůtes, daz man nemmet die mitlosten Grindel, mit allen rehten vnd mit aller zv^o geho^erde aller aigenschaft aller manschaft aller lêhenschaft aller kuntschaft aller gewêr lút vnd brief alles gaistlichen vnd weltlichen rehtes aller vordrung vnd ansprâchen aller reht vnd rehtung, so wir vnd v´nserú geswistrit oder v´nser erben, ob wir enwa^erint, an dem zv^o dem vnd von dez vorgeschribenen gůtes wegen ie gehept habent ald hie nâch iemer gehaben oder gewinnen mo^ehtint, vnd daz wir noch dehain v´nser geswistrit noch dehain v´nser erben noch nieman andre an v´nser stat noch von v´nsern wegen den vorgenemten Hainrich den Zigen noch dehain sin erben noch nâchkomen von dez vorgeschribenen gůtes wegen niemer súllent noch wellent ansprechen v^f triben bekúmberren bekrenken noch in kain wis beswa^eren weder mit gaistlichem noch mit weltlichem geriht noch ân reht noch mit enkainer lay ander sache ân alle geua^erde. Wir habent o^vch baid vnuerschaidenlich gelobt mit v´nseren trúwen vnd lobent mit disem brieue fúr v´ns, fúr den vorgenanten Růdolf v´nsern brůder, fúr a^ellú v´nserú geswistrit vnd fúr alle v´nser erben, dez vorgeschribenen gůtes, daz man nemmet die mitlosten Grindel, mit aller zv^o geho^erde vnd dez ko^vffes reht wer ze sinne fúr reht lêhen nâch dez landes reht vnd o^vch den vorgenanten Hainrich Zigen vnd sin erben darumb ze versprechenn vnd ze versta^enne an allen stetten gen aller ma^englich ân allen iren schaden, wenn wâ vnd wie dik sú darumb an gesprochen geschadgot oder v^f getriben werdent. Vnd wenne o^vch der vorgenant Růdolf v´nser brůder, der in dem lande noch in der gegen niht ist, ze land vnd in diz gegen kumpt, daz wir danne ân allen fúrzug fu^egen vnd schaffen súllent, daz der selb Růdolf v´nser brůder dem êgenemten Hainrich dem Zigen oder sinen erben, ob er enwa^er, daz vorgeschriben gůt, daz man nemmet die mitlosten Grindel, mit allen rehten vnd mit aller zv^o geho^erde vertge vnd zv^o iren handen bring, alz dann reht ist vnd sú sin nôtdurftig sint, ân alle geua^erde. Vnd ist diz alles beschehen vnd vollefu^ert reht vnd redlich mit allen den worten werken vnd geta^eten, so nâch gewonhait vnd nach reht darzv^o gehortent ald ho^eren soltent vnd nôtdurftig wârent vnd alz ez kraft vnd maht sol vnd mag han. Vnd ze ainem waren vrkúnde vnd gantzzer sicherhait aller der vorgeschribenen dinge vnd gedinge so habent wir die vorgenemten Dietdegen vnd V^olrich die Maiger von Altstetten gebrůder fúr v´ns, fúr die vorgedâhten v´nserú geswistrit vnd fúr alle v´nser erben v´nserú insigel gehenkt an disen brief. Der geben ist ze Altstetten an dem na^ehsten zinstag vor aller hailigen tag in dem jâr, do von Cristus gebúrt wârent drúzehenhundert jâr vnd darnach in dem sibenzigostem jâre.

Source Fulltext: Chartularium Sangallense VIII, Nr. 5249, S. 439-440.