Allen den, die disen brief ansehent lesent oder ho^erent lesen, kúnd ich Bartholome Niessli vogt ze Swarzenbach¹ || vnd vergich offenlich mit disem brieue, daz fúr mich kament ze sant Gallen in der stat die beschaiden lúte Cůn||rat der Has von Riggiswille², Adelhait sin elichi wirtinne vnd Cůnrat Migen von Húsern³, die mines herren grâf || Cůnratz von Fúrstenberg⁴ vogtlút sint, vnd veriahent offenlich vor mir, daz sú lieplich vnd gu^etlich gantzlich vnd gar v´ber ain komen vnd beriht wa^erint mit dem spittal ze sant Gallen⁵ mit Johansen Wildrich, Bartholome dem Blarrer vnd mit Johansen Burgo^vwer pflegern dez selben spittales vmb alle die sto^ess vnd ansprach, so sú hattent zů dem vorgeschribenen spittal ze sant Gallen von dez gůtes wegen gelegen ze Ainwille⁶, daz wilunt Ma^etzzinun vnd Gerinun der Wengineran was, vnd entzigent sich o^vch da die vorgenemten Cůnrat der Has, Adelhait sin elichi wirtinne vnd Cůnrat Migen offenlich vor mir willeklich vnd gern gantzlich vnd gar gen dem vorgeschribenen spittal vnd gen den vorgenemten sinen phlegern aller aigenschaft, aller lehenschaft, alles rehten, aller vordrung vnd aller ansprâch gaistlichs vnd weltlichs gerihtes, so sú vnd ir erben, ob sú enwa^erint, an dem vorgeschribenen gůt hattent ald hie nach iemer gewinnen mo^ehtint. Die vorgenemten Cůnrat der Has, Adelhait sin elichi wirtinne vnd Cůnrat Migen lobtent o^vch mit gůten trúwen fúr sich, fúr alle ir erben, fúr alle ir gemainder vnd fúr alle die, die mit in von dez vorgeschribenen gůtes vnd ansprâch wegen gewinnes vnd verlust wartent wa^erint, dez vorgeschribenen gůtes reht wern ze sinne nach reht an gaistlichem vnd an weltlichem geriht vnd an allen stetten, wâ sin die vorgenemten pfleger vnd ir nachkomen vnd der vorgeschriben spittal ze sant Gallen bedurffent vnd nôtdurftig sint. Vnd ze ainem wâren vrkúnde vnd ze ainer sta^eten sicherhait aller der vorgeschribenen dinge vnd gedinge so han ich Bartholome Niessli vogt da vorgenemt durch emsig bet der vorgenemten Cůnrat dez Hasen, Adelhaiten siner elichen wirtinnen vnd Cůnrat Migen, won sú aigener insigel niht hant, min insigel gehenkt an disen brief. Darnâch veriehent wir die vorgenemten Cůnrat der Has von Riggiswille, Adelhait sin elichi wirtinne vnd Cůnrat Migen von Húsern offenlich mit disem brieue fúr v´ns vnd alle v´nser erben ainer gantzzen wârhait aller der vorgeschribenen dinge vnd daz alles daz wâr ist, daz der vorgenemt Bartholome Niessli v´nser vogt von v´ns an disem brief veriehen hât. Vnd won wir aigener insigel niht haben, so haben wir v´ns willeklich gebunden vnd binden v´ns mit disem brieue vnder dez vorgenemten Bartholomês v´nsers vogtes insigel, wâr vnd sta^et ze lassenn alles, daz von v´ns da vorgeschriben stât an disem brief. Der geben ist ze sant Gallen in der stat, an dem na^ehsten donstag nach sant Gallen tag, in dem jâr, do man zalt von gottes gebúrt drúzehenhundert jar, fúnfzig jar vnd darnach in dem sibenden jare.

Source Fulltext: Chartularium Sangallense VII, Nr. 4507, S. 355.