Wir Hiltpolt von gotes genaden apt des gotzhvs von sant Gallen¹ kunden vnd vergiehen || allen den, die disen brief iemmer an sehent ald ho^erent lesen, das fur vns kam Johans der || Rinegger² vnd in vnser hant vns vf gap willeclich den akker, dem man da sprichhet das || Gerstenholtz³, vnd den akker, dem man da sprichhet dv Egge⁴, dv aigenschaft vns vnd vnser gotzhvs an gehorte, vnd bat vns, die selben zwen akker lihen ze rechtem lehen Cv^onrat von Horchhental⁵ vnd Migen siner elichen wirten vnd dar nach allen sinen kinden, des bette haben wir erho^ert vnd lihen vnd haben gelihen die vor genemten zwen akker ze rechtem lehen mit disem brief dem vor geschriben Cv^onr. von Horchhental vnd Migen siner elicher wirten vnd allen sinen kinden, vnd ist diz beschehen, als recht, sit vnd gewonlich was von recht ald von gewonhait, vnd ze ainer gantzer sicherhait dar vmbe so geben wir apt Hiltpolt disen brief besigelten mit vnserm insigel. Ich Johans der Rinegger da vor genemte vergich ain gantz warhait aller der vor geschrihen dinge, vnd ze ainer merer sicherhait dar vmbe so henk ich och min insigel an disen brief. Diz beschach vnd wart dirre brief geben ze sant Gallen, an sant Peters tag, dem man da sprichet kathedra Petri, do man zalt von gotes geburte druzehen hundert jar vnd dar nach in dem drv vnd zwainzegosten jar.

Source Fulltext: Chartularium Sangallense V, Nr. 3176, S. 444.