Ich Růdolf der Mayger von Altstetten¹ kvnd vnd vergich offenlich an disem brief allen den, die in sehent oder ho^erent lesen, daz || Růdolfs des Fedrers seligen kint kament fúr mich vnd fúr minen amman vor sant Mychels tag an der nechsten mit||wochen vnd klegtent mit fúrsprechen hin zů Oswalt Rainolt burger ze Velkirch² vmb den wingarten ze Lúchin||gen³ vnd vmb die gebraiten vnd vmb die hofgu^eter, die von Růdolfen dem Mayger lehen sint, des verantwurt sich der selb Oswalt vor geriht mit fúrsprechen, vnd wart dar vmb ertailet mit gelicher vmb ga^ender vnd gesamnoter vrtail, des was der Kno^ephler des ebenempten Oswaltz Rainolt z fúrsprech, vnd der Jvng was des ebenempten Růdolfs Fedrers kint fúrsprech, vnd wart ertailet, daz man in vngemu^eget an den hofgu^etern sol lassen, die von Růdolf dem Maiger lehen sint, vnd vmb daz rechlehen, daz vom gotzhus ze sant Gallen lehen ist, da wart ertailet mit gesamnoter vrtail, daz si daz reht sůchtint vor dem lehen herren ze sant Gallen vnd daz Oswalt der Rainolt sol gerůwet sin, vntz daz man in da hin ladet mit dem rehten, an dien vorgeschribnen gu^etern, vnd da was ze gegen her Hans von Twingenstain⁴ ritter, Berhtold der Kesler, Ru^edi der Amman burger ze Velkirch, Ru^edi der Gloter, Haintz von Twingenstain, Haintz von Hardeg⁵ vnd der burger von Altstetten sehs, des tags was Haini der Zv´nd rihter an Růdolfs des Maygers statt, do disú vrtail gegeben wart. Des ze ainem waren vnd offem vrkv´nd han ich obgenanter Růdolf der Mayger von Altstetten min aigen insigel gehenket an disen brief, der geben wart ze Altstetten in der statt, do man zalt von gottes gebúrt drúzehenhvndert jar, dar nach in dem drú vnd fúnfzigosten iar, an der nechsten mitwochen vor sant Mychelstag.

Source Fulltext: Chartularium Sangallense VII, Nr. 4317, S. 204-205.