Ich Cůnr. der vrige von Bu^erron¹ lantrichter ze Schatbůch² tůn kunt, das fu^er mich kom an den lantag || ze Schatbůch des na^echosten dunstagz nach sant Gallen tag V^olr. Kaltisen von sant Gallen an der burger || stat gemainlich von sant Gallen vnd bat mich, das ich sa^ech vnd hiesi lesen den brief vnd hantfesti, den su^e || hant von dem durlu^echtigen fu^ersten ku^eng Karllen von Rom, da ir frihait vnd iru^e reht an stand, du^e in der selb ku^eng Karl von Rom geben vnd gefestnot hat, der selb brief mit vrtail gelesen wart vnd stůnd also, daz^a) die obgenanten burger von sant Gallen du^e reht vnd frihait hant von ku^engen vnd von kaisern vnd sunderbar von ku^eng Karllen von Rom, das nieman kainen iro burger triben noch laden sol fu^er iro stat vf kain weltlich geriht, wan das ma^engelich das reht von in nemen vnd vordern sol in iro stat ze sant Gallen vor iro amman, es wa^er danne, das ain kleger da rehtlos wurd gelassen. Do nu dis alles beschach vnd der brief also gelesen ward, do bat im aber der obgenant V^olr. Kaltisen ze erfarend an ainer vrtail, ob ich in it billich dar v^eber min vnd des langerihtz brief geben so^elt, daz ward ertailt vnzerworfenlich, das ich in den wol mit reht gen so^elt, wan si ir ku^englichen brief vnd hantfest durh jeglichen iro burger nit geturrent gesenden vf a^ellu^e geriht. Es ward och me ertailt, durh welan iro burger si disen brief vs sendend vnd vff welas geriht, das der alz gůt kraf hat vnd haben sol, alz ob si iro ku^englichen brief vnd hantfesti vs santind. Vnd des ze vrku^end der warhait aller sach, so hie vor geschriben stat, dar vm so henk ich vorgenanter lantrichter min vnd des langerihtz insigel an disen brief. Der geben ist nach rehter vrtail ze Schatbůch des jarz, do man zalt von gotz geburt dru^ezechen hundert jar, dar nach in dem dritten vnd fu^enfzigistem jar, des obgesch(riben) dunstagz.

Source Fulltext: Chartularium Sangallense VII, Nr. 4320, S. 206.