Allen den, die disen brief ansehent lesent oder ho^erent lesen, kúnd ich Oswalt Rainolt burger ze || Veltkilch vnd vergich offenlich mit disem brieue fúr mich vnd alle min erben von dez nâchgeschribe||nen wingarten vnd akkers wegen, der wingart gelegen obrenthalb Lúchingen, der wîlunt || der . . Vedrer was vnd ainhalb sto^vsset an Bartholome Blarrers wingarten vnd anderthalb an Herman Brunners wingarten, vnd der akker halbe, den man nemmet die Gebrait, gelegen bi der stat ze Altstetten, der o^vch wîlunt der . . Vedrer was, der selb wingart vnd akker min vnd Růdolfs mines brůders vnd V^olrich Zo^ebellis vnsers swâgers reht lehen wârent von dem gotzhus ze sant Gallen, den selben wingarten vnd o^vch den akker halben wir alle drige gemainlich verko^vft haben vnd ze ko^vffenn geben haben dem vorgenemten Bartholome dem Blârrer burger ze sant Gallen vmb drissig pfunt vnd vmb aht pfunt pfenning gůter Costentzer múnse, als der brief¹ wol bewiset, den er darumb von v´ns hât, han ich dem selben Bartholome dem Blarrer den vorgeschribenen wingarten vnd o^vch den akker halben mit allen rehten vnd mit aller zů geho^erde willeklich v^f gesendet bi dem vorgenemten Růdolf minem brůder an dez êrwirdigen mines gna^edigen herren hant von gottes gnâden abt Hermans abt dez vorbenemten gotzhus ze sant Gallen. Vnd ze vrkúnd der wârhait aller der vorgeschribenen dinge so han ich fúr mich vnd alle min erben min insigel gehenkt an disen brief. Der geben ist ze Veltkilch an dem na^ehsten ma^entag nâch sant Vrbans tag, do man zalt von gottes gebúrt drúzehenhundert jâr, fúnfzig jâr vnd darnâch in dem núnden jâr.

Source Fulltext: Chartularium Sangallense VII, Nr. 4598, S. 436.