Allen den, die disen brief ansehent lesent oder ho^erent lesen, kúnden wir die nâchgenemten V^olrich Zo^ebelli der amman, Oswalt || Rainolt sin swager vnd Růdolf sin brůder alle burger ze Veltkilch¹ vnd veriehent offenlich mit disem brieue fúr vns vnd || alle vnser erben, daz wir alle gemainlich mit bedâhtem můt vnd gůter vorbetrahtung willeklich verko^vft habent vnd ze ko^vf||fenn geben habent reht vnd redlich dem êrbern vnd wolbeschaidenn Bartholome dem Blârrer² burger ze sant Gallen vnd sinen erben, ob er enwa^er, den wingarten gelegen obrenthalb Lúchingen³, der wîlunt der . . Vedrer was vnd ainhalb sto^vsset an dez vorgenemten Bartholomês wingarten vnd anderthalb an Herman Brunners wingarten, vnd den akker halben, den man nemmet die Gebrait⁴, gelegen bi der stat ze Altstetten⁵, der o^vch wîlunt der Vedrer was, der selb wingart vnd akker vnser reht lehen wârent von dem gotzhus ze sant Gallen, mit allen rehten nútzzen vnd gewonhaiten vnd mit allem dem, so von reht ald von gewonhait darzů vnd darin geho^erent, vmb drissig pfunt vnd vmb aht pfunt pfenning gůter vnd genger Costentzer múnse, der wir gantzlich vnd gar von im gewert sigent vnd enpfangen habent vnd an v´nsern gůten nutz bekêrt, den selben wingarten vnd o^vch den akker halben habent wir dem vorgenemten Bartholome dem Blârrer fúr reht lehen ze ko^vffenn geben, geuertgot vnd in sin hant brâht reht vnd redlich mit dez êrwirdigen vnsers gna^edigen herren hant von gottes gnâden abt Hermans abt dez vorbenemten gotzhus ze sant Gallen⁶, als reht sitt vnd gewonlich was. Wir habent vns o^vch alle gemainlich willeklich entzigen vnd entzihent vns mit disem brieue gantzlich vnd gar fúr vns vnd alle vnser erben aller aigenschaft, aller lehenschaft, alles rehten, aller vordrung vnd aller ansprâch gaistlichs vnd weltlichs gerihtes, so wir vnd vnser erben, ob wir enwa^erint, an dem vorgeschribenen wingarten vnd o^vch an dem vorgeschribenen halben akker hattent ald hienâch iemer gewinnen mo^ehtint. Wir habent o^vch alle gemainlich vnd vnuerschaidenlich gelobt mit gůten trúwen fúr vns vnd alle vnser erben, dez vorgeschribenen wingarten vnd dez halben akkers vnd o^vch dez vorgeschribenen ko^vffes reht wern ze sinne nâch reht gen ma^enlichem an gaistlichem vnd an weltlichem geriht vnd an allen stetten, wâ vnd wenn vnd wie dik sin der vorgenemt Bartholome Blârrer oder sin erben, ob er enwa^er, bedurffent vnd nôtdurftig sint. Vnd ist diz alles beschehen vnd vollefu^ert reht vnd redlich mit allen den worten vnd werken, so von reht ald von gewonhait darzů gehortent ald ho^eren soltent vnd nôtdurftig wârent vnd als reht sitte vnd gewonlich was. Vnd ze ainem wâren vrkúnde vnd gantzer sicherhait aller der vorgeschribenen dinge vnd gedinge so haben wir die vorgenemten V^olrich Zo^ebelli, Oswalt Rainolt vnd Růdolf sin brůder fúr vns vnd alle vnser erben vnserú insigel gehenkt an disen brief. Der geben ist ze sant Gallen in der stat an dem na^ehsten ma^entag nâch sant Vrbans tag, in dem jâr, do man zalt von gottes gebúrt drúzehenhundert jar, fúnfzig jâr vnd darnâch in dem núnden jâre.

Source Fulltext: Chartularium Sangallense VII, Nr. 4597, S. 435-436.