Allen den, die disen brief ansehent lesent oder ho^erent lesen, kúnd ich Burkart von Ramswâg¹ vnd vergich offenlich mit || disem brieue fúr mich vnd alle min brůder von dez hofes wegen an der Metlun gelegen ze Hasla² in dem Rintal, der dez || spittals ze sant Gallen³ ist, den selben hof die pfleger dez selben spittals ze sant Gallen gelihen hant Johansen dem || Sturm, der v´nser aigen ist von dem libe, mit so^elicher beschaidenhait vnd gedinge, daz er den selben hof vnwůstklich vnd in gůtem buwe haben sol, vnd sol o^vch der selb spittal vnd alle, die ez von sinen wegen bedurffent, gewalt han ze varn v´ber den selben hof, den sú im verlihen hant, wenn vnd wie dik sú dez bedurffent vnd nôtdurftig sint. Vnd wa^er, daz die maister oder die pfleger, weli dann dez selben spittals maister oder pfleger sint, dehaines jares duhti, daz er in vff dem selben hof niht fúrbas fůgti ze ainem buman, so hant sú vollen gewalt, den selben hof ainem andern ze lihenn, wem sú dann wellent, vnd sont o^vch dann dem egenemten Johansen Sturm ab sagen in der zit, als dann sitte vnd gewonlich ist, vnd sol er sú dannenhin daran niht fúrbaz sûmen noch ierren mit worten noch mit werken noch mit dehainen andern sachen. Wa^er o^vch, daz im der selb hof dehaines jâres fúrbaz niht fůgti ze buwenn vnd in niht fúrbaz buwen wo^elt, so sol er o^vch den maistern oder den pflegern dez selben spittals bi der zit ab sagen vnd den hof vf geben, als dann o^vch sitte vnd gewonlich ist, vnd wa^er dann, daz der vorgenemt Johans Sturm oder sin erben, ob er enwa^er, dem selben spittal iht schuldig wa^erint vnd gelten so^eltint, so hânt o^vch die selben maister vnd pfleger vnd ir helffer vollen gewalt vnd friges vrlob, darnach wenn sú wellent den selben Johansen den Sturm vnd sin erben darum ze pfendenn vnd ze no^etenn mit geriht vnd ân geriht ân klag vnd ân zorn, wie vnd wa sú daz getůn mugent, als vil vnd als lang, vntz daz sú dez ho^vpgůtes vnd o^vch dez schaden, in den sú vnd ir helffer von dez selben pfendens vnd no^etens wegen koment, gantzlich vnd gar gewert werdent, vnd sol ich noch kain mit brůder noch kain v´nser erben noch nieman andre an vnser stat noch von v´nsern wegen sú daran niht sumen noch ierren in kainen weg noch mit kainen sachen. Vnd ze ainem wâren vrkúnde vnd gantzer sicherhait aller der vorgeschribenen dinge vnd vergiht so han ich Burkart von Ramswâg da vorgenemt fúr mich fúr alle min brůder vnd fúr den vorgenemten Johansen Sturm vnd fúr alle v´nser erben min insigel gehenkt an disen brief. Der geben ist ze sant Gallen, an dem na^ehsten ma^entag nâch sant Othmars tag, do man zalt von gottes gebúrt drúzehenhundert jâr, fu^enfzig jâr vnd darnach in dem núnden jâre.

Source Fulltext: Chartularium Sangallense VII, Nr. 4649, S. 474-475.