Wir Karl von gots gnaden Romischer keiser zu allen czeiten merer des reichs vnd kunig zu Beheim embieten den burgermeistern dem rat || vnd den burgern gemeinlich der stat zu sand Gallen in Swaben vnsern vnd des heiligen reichs lieben getrewen vnser huld vnd alles || gut. Lieben getrewen, wann wir vorczeiten mit rechter wizzen verschriben vnd gegeben haben den ersamen Rudolf von Frideberg³ probste || zu Wetslar⁴ vnd Heinrich von Wyesel⁵ vnsern heimlichen schreibern vnd houegesinde sotan stewer, als ir vns vnd dem heiligen reich auff diesem nehesten vergangen sand Merteins tag pflichtig vnd schuldig waret vnd seit zu geben, douon heizzen empfelhen vnd gebieten wir euch vesteclich bei vnsern vnd des reichs hulden, daz ir den vorgenanten Rudolffe vnd Heinriche ane verczog vnd wiederrede dieselbe gewonliche stewer, die ir vns vnd dem reich vff den vorgenanten sand Mertins tag sullet geben, richtet gebet vnd antwertet, vnd derselben stewer sagen wir euch ouch quit ledig vnd loz mit diesem brieff. Mit vrkund dicz briefs versigelt mit vnserer keiserlichen maiestat insigel. Der geben ist zu Prag nach Crists geburt dreuczenhundert jar, darnach in dem neun vnd funfczigisten jar, an sand Thomas abend dez heiligen czwelfboten, vnserer reiche in dem vierczenden vnd des keisertums in dem funften jare.

Source Fulltext: Chartularium Sangallense VII, Nr. 4657, S. 482.