Ich^a) Cristophel Maiger von Altstetten¹ vndervogt in dem Rintal tůn kunt vnd vergich offenlich mit disem || brieue fúr mich vnd fu'r alle min erben allen, die in sehent lesent oder ho^erent lesen, daz ich mit gůter vorbe||trahtung den akker, den man nemmet der Raffer² gelegen ob Altstetten³ ennent dem Vorst⁴, der ainhalb stosset || an dez spittals gůt ze sant Gallen⁵, daz man nemmet dez Struben gůt, vnd anderthalb an die offenen strasse, die man nemmet der hol weg, mit allen rehten nútzzen vnd gewonhaiten vnd mit aller zv^o geho^erde, der selb akker min reht ledig aigen waz, redlich vnd reht aines iemer werenden sta^eten ewigen ko^vffes verko^vft vnd ze ko^vffenn geben han den ersamen Bartholome dem Blarrer, V^olrich Ru^edger vnd V^olrich dem Ko^echler phleger der siechen dez vorgeschribenen spittals ze sant Gallen an dez selben spittals statt vnd zv^o sinen handen vmb drú phunt phenning gůter vnd gena^emer Costentzzer múnse, der ich gantzlich von in gewert bin vnd enphangen han vnd an minen offenn nutz bewendet, vnd han in o^vch den selben vorgeschribenen akker mit allen rehten vnd mit aller zv^o geho^erde offenlich an dez richs strasse fúr ain reht ledig aigen reht vnd redlich vf geben geuertgot vnd zv^o dez selben spittals handen braht mit allen den worten werken vnd geta^eten, so nach gewonhait vnd nach reht darzů gehortent ald ho^eren soltent vnd notdurftig warent vnd alz ez kraft vnd maht sol vnd mag han, vnd dar umb so han ich mich willeklich verzigen vnd verzieh mich mit vrkúnd diz brieues gantzlich vnd gar fúr mich vnd fúr alle min erben dez vorgeschribenen akkers mit aller zv^o geho^erde aller aigenschaft aller lehenschaft aller kuntschaft aller gewer lút vnd brief alles gaistlichen vnd weltlichen rehtes aller vordrung vnd ansprachen aller reht vnd rehtung, so ich oder min erben an dem zv^o dem vnd von dez vorgeschribenen akkers wegen ie gehept han ald hie nach iemer gehaben oder gewinnen mo^ehtint, vnd daz ich noch enkain min erben noch nieman andre an v´nser stat noch von v´nsern wegen die vorgenemten phleger noch dehain iro nachkomen noch den vorgeschribenen spittal ze sant Gallen von dez selben akkers wegen niemer súllent noch wellent ansprechen vf triben bekúmberren bekrenken noch in kain wis beswa^eren weder mit gaistlichem noch mit weltlichem geriht noch an reht noch mit enkainer lay ander sachen an alle geua^erde. Ich han o^vch gelobt mit miner trúwe vnd loben mit disem brieue fúr mich vnd fúr alle min erben, dez vorgeschribenen akkers mit aller zv^o geho^erde vnd dez ko^vffes fúr ain ledig aigen reht wer ze sinne nach dez landes reht vnd o^vch die vorgenemten phleger vnd iro nachkomen vnd den vorgeschribenen spittal ze sant Gallen darumb ze versprechenn vnd ze versta^ennt an allen stetten gen aller ma^englichem an allen iren schaden, wenn wâ vnd wie dik sv´ darumb an gesprochen geschadgot oder vf getriben werdent mit dem rehten. Vnd ze vrkúnd der warhait aller der vorgeschribenen dinge vnd vergiht so han ich Cristophel Maiger vogt da vorgenemt fúr mich vnd fúr alle min erben min insigel offenlich gehenkt an disen brief. Der geben ist ze Altstetten an dem na^ehsten fritag nach aller hailigen tag in dem jar, do man zalt von Cristus gebúrt drúzehenhundert jâr, ahtzig jar vnd darnach in dem fúnften jâre.

Source Fulltext: Chartularium Sangallense X, Nr. 6116, S. 305-306.