Allen^a) den, die disen brief ansehent lesent oder ho^erent lesen, kúnd ich Hainrich Wahter Priester vnd vergich || offenlich an disem brief fúr mich vnd fúr alle min erben, daz ich mit beda^vhtem můt frilich willeklich || vnd vnbetwungenlich ze den ziten vnd ze den tagen, do ich es wol getůn moht, dem beschaiden man || Johansen dem Ho^ern burgermaister ze den ziten ze sant Gallen vnd sinen erben das hûs hofstat vnd bo^vngarten mit aller zůgeho^erd, das mich von minem lieben o^ehem sêlig Herman Egger anerstorben ist vnd ainhalb sto^vzzet an den Bru^el¹ ze sant Gallen, ains rehten redlichen êwigen ko^vffes ze ko^vffenn geben han vnd gib mit disem brief vmb âht vnd vîertzig pfunt pfenning gůter Costentzer múns, die er mir darumb geben hât vnd gar vnd gantzlich von im gewert vnd bezalt bin, das selb hûs hofstat vnd bo^vngart min lêhen was von dem êrwirdigen gotzhûs ze sant Gallen, dannen ich im o^vch das selb hûs hofstat vnd bo^vngarten mit allen rehten vnd zůgeho^erd geuertgot vnd mit lêhenschafft in sin hand vnd gewalt braht han, als vmb semlichú gůt vnd lêhen gewonlich vnd reht ist ze vertgenn, âne geuerde, vnd han mich hier v´ber willeklich vnd gern verzigen vnd verzihe mich mit disem brief aller aîgenschafft aller lehenschafft aller vordrung aller ansprach alles rehten gaistlichs vnd weltlichs gerihtes, so ich ald min erben an dem zů dem vnd von des vorbenemten hûs hofstat vnd bo^vngarten wegen iê gehept han ald hie nach iemer gehaben oder gewinnen mo^eht in dehainen weg mit dehainen sachen âne geuerde. Ich han o^vch fúr mich vnd fúr alle min erben gelo^vpt vnd lo^vben mit disem brief, des vorbenemten ko^vffes reht wer ze sinne nach reht an allen den stetten, da sin der obgenant Johans Ho^er ald sin erben, ob er enwa^er, bedurfent vnd no^vtdurftig sint, âne geuerde. Vnd des ze ainem waren vrkúnd han ich Hainrich Wahter da vorgenant min aîgen insigel fúr mich vnd fúr alle min erben offenlich gehenkt an disen brief ze ainer bezúgnúste aller vorgeschribenen ding. Der geben ist an dem na^ehsten zinstag vor v´nser fro^vwen tag ze herbst, do man zalt von Cristus gebúrt drútzehenhundert iâr, âhtzig iâr vnd darnach in dem fúnften jâre.

Source Fulltext: Chartularium Sangallense X, Nr. 6108, S. 297-298.