Allen den, die disen brief ansehent lesent oder ho^erent lesen, kúnden wir Růdolff vnd Cůnrat von Gru^enenstain¹ gebrůder vnd veriehen offen||lich an disem brief, daz wir baid mit beda^vhtem můt verko^vfft vnd reht vnd redlich ze ko^vffenn geben habint vnd geben mit disem brief || den fromen beschaidnen Bartholome vnd Johansen den Blârrern pflegern des spitals ze sant Gallen² vnd allen iren nachkomen ze des || vorbenemten spytals ze sant Gallen handen zwaî viertal haber ja^erlichs geltz ab dem vnd vsser dem hof genant Grůno^vw³ gelegen in dem Rintal ennent dem Vorst⁴ vnder der Lîten⁵ vmb fúnfzehen schilling pfenning gůter vnd gena^emer Costentzer múns, die wir dar vmb von inen enpfangen habint vnd gantzlich von inen gewert sint, vnd habint inen vnd dem vorbenemten spytal o^vch dú selben zwaî viertal haber ja^erlichs geltz letklich v^f geben vnd geuertgot an offener des rîches strasse, als reht sitte vnd gewonlich ist, vnd habint v´ns baid hier v´ber willeklich vnd gern gen den vorgenanten Bartholome vnd Johansen den Blârrer pflegern vnd allen iren nâchkomen vnd gen dem vorbenemten spital fúr v´ns vnd fúr alle v´nser erben vnd nachkomen gar vnd gantzlich verzigen vnd verzihen v´ns mit disem brief aller vordrung vnd ansprach alles rehten gaistliches vnd weltliches gerihtes, da mit wir ald v´nser erben, ob wir enwa^erint, die vorgenanten pfleger ald iro nachkomen vnd den vorbenemten spytal von der selben zwaiger viertal haber ja^erlichs geltz iemer angesprechen bekrenken ald bekúmberron mo^ehtint in dehainen weg oder mit dehainen sachen, âne geuerde. Wir habint o^vch baid gelo^vpt vnd lo^vben mit disem brief fúr v´ns vnd v´nser erben, des vorgeschribenen ja^erlichen geltz vnd o^vch des vorbenemten ko^vffes reht wem ze sinne nach reht gen ma^englichem vor gaistlichem vnd vor weltlichem gerihte vnd âne gerihte, wô ald wenn ald wie dik des die vorgenanten pfleger ald iro nachkomen ald der vorgenant spital ze sant Gallen bedurffent vnd no^vtdurfftig sint, âne geuerde. Vnd des ze ainem waren vrkúnd vnd gantzzer sicherhait so habint wir die vorgenanten Růdolff vnd Cůnrat von Gru^enenstain gebrůder baid v´nsri aîgenú insigel fúr v´ns vnd fúr alle v´nser erben offenlich gehenkt an disen brief ze ainer bezúgnúste aller vorgeschribenen ding. Der geben ist an sant Thomas abend des zwêlffbo^vtten in dem iâr, do man zalt von Cristus gebúrt drútzehenhundert iâr vnd darnach in dem drú vnd sibentzigosten jâre.

Source Fulltext: Chartularium Sangallense IX, Nr. 5388, S. 62.