Ich^a) Cůncz von Vino^vw¹ hoffmeister dez edelen mines genedigen herren hern Kraftes von Hohenloch² vnd mit mir Andres || Hagdorn veriehent offenlichen mit disem brief, daz vns der erber bescheiden kneht Walther Go^eseler von sant Gallen het || bezalt vnd geweret vff disen tag, als dirre brief geben ist, von der fromen wisen vnd bescheidenen lúte wegen des || burgermeisters dez rates vnd der burger gemeinlich der stat ze sant Gallen núnhundert gůter vnd geber guldin Nu^erenberger werung an den vier vnd zwenczig hundert guldinen, die die vorgenanten der burgermeister der rat vnd die gemeind gemeinlich der stat zů sant Gallen ieczend schuldig sint dem hochgebornen vnd allerdurlúhtigosten v´nserem genedigen herren dem keiser Karlen, vnd wan wir von vnsers vorgenanten herren wegen von Hohenloch daz selbe gelte hie enphahen súllen von gewaltes wegen, den er dar vmb het von vnserem herren dem keiser, so sagen wir die vorgenanten Cůncz von Vino^vw vnd Andres Hagdorn den egenanten Walther Go^esler von sant Gallen der vorgenanten núnhundert guldin, die er von den obgenanten dem burgermeister dem rat vnd den burgeren gemeinlich von sait^b) Gallen bezalt vnd gewert het, quit ledig vnd los mit disem brief von v´nsers vorgenanten herren von Hohenlochs wegen vnd an siner stat, der ze vrkúnd besigelt ist mit vnsers herren hern Go^eczen von Hohenloch³ dez vorgenanten hern Kraftes brůder ingesigel vnd mit vnseren hangenden ingesigeln. Vnd dar zů zů merer sicherheit so haben wir die vorgenanten Cůncz Vino^vw vnd Andres Hagdorn gebetten die fromen bescheidenen vnd wisen lúte Cůnraden Glahemmer miner genedigen herren schriber von Wirtenberg⁴ vnd Dieczen Belssen vogt ze Vrach⁵, daz si von v´nser bet wegen ir ingesigel hand gehenkt an disen brief. Wir die vorgenanten Cůnrat Glahemmer miner genedigen wolgebornen herschaft schriber von Wirtenberg vnd ich Diecz Belsse vogt ze Vrach veriehent mit vrkúnd dis briefes, daz dis obgeschriben ding also geschehen ist ze Vrach in der stat vnd wir da bi vnd mit gewesen sint vnd v´ns daz kunt vnd wissend ist, daz der egenant Walther Go^esler daz egenant gelt geriht geben vnd bezalt het von der obgenanten lúten dez burgermeisters des rates vnd der stat gemeinlich ze sant Gallen wegen, vnd von bett wegen der obgenanten Cůnczen von Vino^vw vnd Andres Hagdornes so haben wir v´nserú eigenú ingesigel gehenkt an disen brief. Der geben wart ze Vrach in der stat am donrstag noch dem wissensunnentag dez jares, do man zalt von Cristes gebúrt drúzehenhundert jar vnd vier vnd sibenzig jar.

Source Fulltext: Chartularium Sangallense IX, Nr. 5396, S. 69-70.