Wir^a) Cůno von gottez gnâden abt dez gotzhus ze sant Gallen¹, daz ân alles mittel zůgeho^ert dem stůl ze Rôme, sant Benedichten ordens || in Costentzer bystum veriehen vnd tu^en kunt offenlich mit disem brieue allen, die den selben disen brief an sehent oder ho^erent lesen, daz fúr v´ns || kam ze Wil² in v´nser statt an disem húttigen tag, alz der brief geben ist, die ersam vnd frôme frow fro Anna die Koppin wilent Cůnrat || dez Koppen sailigen elichi frow vnd Margareta vnd aber Margareta ir elichen tôchteran vnd batent v´ns mit flissigem ernst, daz wir inen ze lehen vnd ze gemainschaft lihen weltint iren hof ze Vfhofen³ mit vogtyen mit gerichten mit zwingen mit ba^ennen vnd mit allen andren rehten nútzzen vnd gewônhaitten, so zů dem selben hof vnd darin gehortint, der selb hof ir lehen wa^eri von v´nserm gotzhus ze sant Gallen, vnd won v´ns die bett alz redlich dûhte, so haben wir si der willentklich gêêrot vnd gewert vnd haben mit wolbedahtem můt den vorgeschriben hof ze Vfhofen mit vogtyen mit twingen mit ba^ennen vnd mit allen andren rehten nútzzen vnd gewonhaitten vnd mit aller zůgeho^erung verlihen den vorbenemten fro Annen Koppinen, Margretun vnd aber Margretun ir elichen tochteran vnd lihen och redlich vnd reht mit vrkúnd dis briefs allen drin gemainlich vnd vnuerschaidenlich ze rehtem lehen vnd ze ainer rehten gemainschaft vnd in gemainschaft wise ân geuerd vnd doch och also, daz die selb fro Anna Koppin vnd die vorbenemten ir tochteran von besundern gnaden vnd rehten, so wir in darúber getan geben vnd verlihen haben, den selben vorgeschriben hof mit allen obgedahten rehten nútzzen vnd gewônhaitten vnd mit aller zůgeho^erd in lehens wise haben vnd niessen sont in gelicher wise vnd in allen dem rehten, alz ob si man oder knâben wa^erint, vnd doch och v´ns vnd v´nserm gotzhus vnd nahkomen ân allen v´nsren rehten vnd gůten gewônhaitten, so wir von dem selben hof vnd darab haben, in dirr sach gentzlich vnscha^edlich vnd vorus bedingot vnd behalten gentzlich vnd gar ân alle geuerd. Vnd ist dis allez redlich vnd reht beschehen volfůrt vnd volbraht mit aller ordnung worten werken geba^erden vnd geta^eten, so darzů gehortent vnd geho^eren mohtent von gewônhait vnd von rehte vnd alz es kraft vnd maht sol vnd mag han nv vnd hernach luterlich ân alle geuerd. Vnd dez vnd hierúber ze ainer besta^eten warhait aller vorgeschribner ding vnd gedingde haben wir abt Cůno da vorgenant v´nser insigel offenlich gehenkt an disen brief. Der geben ist ze Wil an sant Hylariien tag, do man zalt von gottes gebúrt drúzehenhundert jar, darnach in dem ain vnd ahtzigosten jar.

Source Fulltext: Chartularium Sangallense IX, Nr. 5826, S. 481-482.