Allen dien, die disen gegenwrtigen brief iemer an gesehent alder ho^erent lesen, kund ich her V^olrich der Giel¹ ritter || vnd^a) min sun R.², das wir vnsern hof ze Gebrehswille³, der vnser reht lehen ist von dem gotteshus ze sant Gallen, || vnd alles das da zů horet, mit stok vnd mit zwi, mit holz vnd mit veld vnd bi namen alles, das dar zů horet, II haben geben ze kofen fur ledig vnd lar vnd vnansprechig^b), won das vro Gůt Cůnrat seligen wirten von Hemberg⁴ ain lipgedinge dar vf het, Egelolf dem Blarer burger ze sant Gallen vmb sehzehen march lotiges silbers Costencer gewa^eges, die wir von im enphangen haben, im den selben hof ze haben vnd ze besizzen in allem dem reht, als och wir in vnz her besessen haben, wir die vor genemten her V^olrich vnd R. veriehen och, das wir des selben hofes wem sulin sin nach reht, vnd dar vmb geben wir dem vor genemten Egelolf ze troster V^olrichen den Giel vnsern vettern⁵. Wir vrchundigen och an disen^c) brief, das wir offenlich den vor gescriben hof vnd alles, das da zů ho^eret, vrilich vnd vnbetwngenlich vf gaben in vnsers herren hant abt Hainriches von sant Gallen⁶ mit allen den worten vnd och werchen, so ze solicher lehenschaft ho^eren sol, vnd durch vnser baider bette do lehe der vor genemt vnser her abt Hainrich den vor gescriben hof ze rehten^c) lehen dem vor^d) gesprochen Egelolf dem Blarer⁷. Vnd das dis alles sament war sige vnd stât belibe, dar vmb so geben wir dem^e) vor genemten Egelolf disen brief besigelt mit vnser baider insigeln ze ainem waren vrchunde aller der dinge, so an disem brief gescriben sint. Dirre brief wart gescriben vnd gegeben ze sant Gallen des iares, do man zalt von gottes geburt druzehenhundert vnd zwelf iar, an dem ersten maintag in dem aprellen, da zegegen wan^c) die erba^eren gezuge, die hie nach gescriben sint, H. Meldeli⁸, R. der Spiser⁹, Hatmar von Wartense¹⁰, der alt Her, H. Esching, der amman von Huntwille¹¹, Herman an Menweg, Volci^f)der tailer vnd ander biderber luten vil.

Source Fulltext: Chartularium Sangallense V, Nr. 2817, S. 214-215.