Wir die ainlof ze disen ziten geswornen rihter der stat ze sant Gallen tu^en kunt vnd veriehent offenlich mit disem brieue allen, die in sehent lesent oder ho^erent lesen, || daz fúr v´ns kament ze sant Gallen in der stat an dem na^ehsten fritag nach v´nser fro^vwen tag ze der liehtmisse, do wir offenlich ze geriht sassent, diz nachge||nemten erberen lút fro Anna Cůntzzen Koppen sa^elgen wilunt elichi husfro^vw vnd Margaretha ir êlichi tohter ze ainem tail, V^olrich Ko^echler, V^olrich Storcheg||ger vnd Gerwig Hesse an stat vnd in namen der siechen dez spittals ze sant Gallen¹ vnd Hainrich der Suter von Maggeno^vw² an stat vnd in namen der a^ebtissennen vnd dez conuentes gemainlich dez closters ze Maggeno^vw³ ze dem andern tail, vnd offenoten da die vorgenemten fro Anna die Koppin und Margaretha ir tohter mit fúrsprechen offenlich vor v´ns an gemainem geriht vnd sprachent, sv´ hettint etwas vor v´ns vnd dem geriht ze schaffenn, vnd batent v´ns darumb sprechen vnd ertailen, wie sv´ sich stellen so^eltint, alz reht wa^er vnd daz ez kraft hett vnd haben mo^eht nv vnd o^vch hie nach. Darumb wir ainhelleklich sprachent vnd ertailtent, daz sv´ ainen vogt nemen so^eltint an dem ring, wen sv´ wo^eltint, vnd daz ez danne also wol kraft vnd maht hetti nach dem rehten. Do nament sv´ ze vogt v´ber diz sache den ersamen Albreht von Ainwille hern Burkartz sa^elgen sun von Ainwille⁴ ritters. Darnach offenoten aber die vorgenemten fro Anna die Koppin, Margaretha ir tohter vnd ir vogt mit fúrsprechen offenlich vor v´ns vnd sprachent, daz sv´ lieplich vnd gu^etlich nach iro frúnd vnd nach ander erber lút rat v´berain komen vnd verriht wa^erint gantzlich vnd gar mit den vorgedahten fro^vwen von Maggeno^vw, mit den egenemten V^olrich dem Ko^echler, V^olrich Storchegger vnd mit Gerwig Hessen an dez vorgedahten spittals stat ze sant Gallen vmb alle die sto^esse misshellung vnd ansprachen, die sv´ mit in ald zv^o in gehept hettint vntz her vff disen húttigen tag, alz dirre brief ist geben, ez wa^er von dez getrettes wegen der ho^ef ze Vfhofen⁵ vnd ze Gebraswille⁶ oder von dehainer lay ander sto^esse misshellung oder ansprachen wegen, ez wa^er genemptz oder vngenemptz wissentz oder vnwissentz, vnd offenoten o^vch die vorgenemten baid tail offenlich vor v´ns vnd dem geriht vnd veriahent, daz die selb rihtung zwischen in also beschehen vnd vollefu^ert wa^er, alz hie nach geschriben stat an disem brief. Dez ersten, daz sv´ baidenthalb von der vorgedahten sto^esse misshellung vnd ansprachen wegen ainer ander luter gůt frúnd sin sont vnd aller der, wie die genant sint, die der selben tail dewedrem in den selben sachen geraten oder geholffen hettint, ân alle geua^erde. Die vorgenemten baid tail veriahent o^vch offenlich vor v´ns vnd dem geriht fúr sich fúr alle iro erben vnd nachkomen, daz sv´ vnd alle iro erben vnd nachkomen, in dero hant diz nachgeschribenen ho^ef vnd gu^eter iemer koment, die ho^ef ze Vfhofen, die der obgenanten fro Annen Koppinen vnd Margarethen ir tohter sint, die selben ho^ef wilunt der Giel von Glattburg⁷ warent, der hof, den man nemmet daz Bachlehen⁸, vnd der hof, den man nemmet Hasenhůb⁸ gelegen ze Gebraswille, die dez vorgedahten closters ze Maggeno^vw sint, vnd die zwen ho^ef, die man nemmet die Staigen⁹ o^vch ze Gebraswille gelegen, die dez vorgedahten spittals ze sant Gallen sint, daz die selben ho^ef alle vnd alle, die die selben ho^ef inne hant vnd buwent, ain getrette hinnenhin iemermêr êweklich mit ain ander vnd vff ain ander mit irem vich nach getrettes reht vnd gewonhait haben sont vnd daz ir kainer den andern tail daran niht sumen noch ierren sont weder mit geriht noch ân reht, ân alle geua^erde. Die vorgenemten fro Anna Koppin vnd Margaretha ir tohter swůrent o^vch offenlich vor v´ns vnd dem geriht mit dez vorgenanten iro vogtes willen ietwedri besunder willeklich ainen gelerten aid ze den hailigen mit vfgehabenen vingern, vnd die vorgenemten V^olrich Ko^echler, V^olrich Storchegger vnd Gerwig Hesse lobtent o^vch von dez vorgedahten spittals wegen, vnd der egenemt Hainrich Suter vnd Cůnrat Sa^erri lobtent o^vch an der vorgedahten fro^vwen stat von Maggeno^vw, alles daz sta^et ze habenn ze lassenn vnd ze vollefu^erenn, daz von in da vor vnd hie nach an disem brief geschriben stat, vnd daz enkain tail vnder in den andern tail von der vorgedahten sto^esse misshellung noch ansprachen wegen noch von dehaines schaden wegen, so da von vf gelo^vffen ist biz her vff disen húttigen tag, niemer mêr súllent noch wellent an sprechen vf triben bekúmberren bekrenken noch in kain wis beswa^eren weder mit gaistlichem noch mit weltlichem geriht noch ân reht noch mit enkainer lay ander sache ân alle geua^erde. Wa^er o^vch, daz dewedre tail dehain brief hettint ald hie nach iemer fundint, die von den vorgeschribenen sachen vnd sto^esse wegen von dehainem der vorgeschribenen tail erlanget vnd erworben wa^erint vor disem húttigen tag, alz dirre brief ist geben, ez wa^er von gaistlichen ald von weltlichen rihtern oder von gemainen ald von schidlúten, die selben brief sont alle vnnútz vnkreftig vnd tôt sin an allen stetten vnd an allen gerihten, wa man sv´ fúr bútet. Ez ist o^vch in der vorgeschribenen rihtung mit namen bedingot vnd berett, bescha^ech, daz got niht welle, daz sich befund vnd kuntlich wurd, daz dewedre vnder den vorgeschribenen tailn die vorgeschribenen rihtung v´ber fůr vnd brúchig wurd, daz der selb brúchig tail dem andern tail, gen dem er v´beruarn hett, fúnfzig guldin vnd ainem abt ze sant Gallen o^vch fúnfzig guldin ze rehter pên veruallen sin sol, vnd sol die vorgeschriben rihtung dennoht an ir selber sta^et bestân vnd beliben. Vnd wenne diser gegenwúrtig brief mit den insigeln gantzlich besigelt vnd vollebraht wirt, so sont die vorgenemten V^olrich Ko^echler, V^olrich Storchegger vnd Gerwig Hesse vnd o^vch die vorgenemten Hainrich Suter vnd Cůnrat Sa^erri von der vorgeschribenen gelúbt, die sv´ getan hant, gantzlich vnd gar ledig sin vnd los. Vnd ze vrkúnd der warhait aller der vorgeschribenen dinge vnd vergiht so habent wir die vorgedahten rihter von dez gerihtes wegen dez gerihtes ze sant Gallen insigel offenlich gehenkt an disen brief, won ez o^vch mit gemainer vrtail ertailt ward, daz wir ez tůn so^eltint. Darnâch veriehent wir die vorgedahten die a^ebtissenne vnd der conuent gemainlich dez closters ze Maggeno^vw vnd wir dez vorgedahten spittals phleger vnd wir Anna Koppin, Margaretha ir tohter vnd Albreht von Ainwille iro vogt in der vorgeschribenen sache ainer gantzzer warhait aller der dinge vnd gedinge, so von v´ns an disem brief da vorgeschriben stânt. Vnd ze merer sicherhait der selben dinge so haben wir die a^ebtissenn vnd der conuent gemainlich dez closters ze Maggeno^vw v´nsers conuentes ze Maggeno^vw insigel vnd wir dez vorgedahten spittals phleger habent o^vch dez selben spittals insigel vnd ich Albreht von Ainwille han o^vch min insigel gehenkt an disen brief, vnder dez selben Albrehtz von Ainwille v´nsers vogtes insigel wir die vorgenemten Anna Koppin vnd Margaretha ir tohter v´ns willeklich gebunden habent, won wir aigener insigel niht habent, wâr vnd sta^et ze lassenn alles, daz von v´ns da vorgeschriben stat an disem brief. Der geben ist ze sant Gallen an dem vorgeschribenen fritag in dem jar, do man zalt von Cristus gebúrt drúzehenhundert jar vnd darnach in dem ahtzigostem jare.

Source Fulltext: Chartularium Sangallense IX, Nr. 5768, S. 438-440.