Allen^a) den, die disen brief ansehent lesent oder ho^erent lesen, kúnden wir dis nâchgenemten V^olrich Gelter burger ze sant || Gallen vnd Katherina Bolerin sin elichi wirtinne vnd veriehen des offenlich an disem brief, das v´ns die fromen wîsen || der burgermaister der rât vnd burger gemainlich der stat ze sant Gallen zehen pfunt pfenning gůter Costenzer múnse || gantzlich geben vnd bezalt hant an dem gůt, das si von minen der obgenanten Katherinen wegen inne hant, also das v´ns dú selben zehen pfunt pfenning an dem ho^vpgůt des selben gůtes worden sint, vnd darvmb so sagen wir die selben burger vnd die stat ze sant Gallen vnd ir nachkomen der selben zehen pfunt pfenning gantzlich quitt ledig vnd los fúr v´ns vnd v´nser erben. Wir haben o^vch gelopt vnd loben mit disem brief, wa^er das v´nser herr der abt von sant Gallen oder sin nachkomen oder ieman andre, wer oder welhi die wa^erint, dehain vordrung oder ansprach zů den selben burgern vnd der stat ze sant Gallen hettint oder gewunnint ietzo oder hienach von der selben zehen pfunt pfenning wegen, es wa^er vff gaistlichem oder vff weltlichem geriht, wenn wâ oder wie dik das bescha^eh, das wir vnd v´nser erben, ob wir ensint, die selben burger vnd die stat ze sant Gallen vnd ir nachkomen darvmb allweg versprechen vnd verstân so^ellin vnd wellen an allen stetten ân allen iren schaden nâch dem rehten gen ma^englichem âne alle geua^erde. Vnd des ze vrkúnd han ich der obgenant V^olrich Gelter min insigel fúr mich fúr die obgenanten Katherinen min elichen wirtinnen vnd fúr alle v´nser erben gehenkt an disen brief, vnder das selb insigel ich die selb Katherina mich willeklich gebunden han aller vorgeschribnen dinge vnd gedinge, won ich aigens insigels nit hatt. Dirr brief ist geben ze sant Gallen an dem zwelfften abent ze den wihenna^ehten, do von Cristus gebúrt warent drúzehenhundert jâr vnd darnach in dem ain vnd ahtzigosten jâre.

Source Fulltext: Chartularium Sangallense IX, Nr. 5824, S. 479-480.