Allen^a) den, die disen brief ansehent lesent oder ho^erent lesen kúnden wir die nachge||nemten Hainrich vnd Johans die Růtzzenwiller gebrůder vnd veriehent offenlich || mit disem brieue fúr v´ns fúr alle v´nser erben vnd nachkomen, daz v´ns die ersa||men Johans vnd Hainrich die Blarrer gebrůder, Gerwigs dez Blarrers sa^elgen sún burger ze Costentz, daz gůt, daz man nemmet die Rúti¹, gelegen obrenthalb der kylchen ze Cappelle², daz ainhalb stôsset an den hof ze Brugga³ vnd anderthalb an die ho^eltzzer, die ze disen ziten Sprúnglis sint, mit so^elicher beschaidenhait vnd in dem rehten ze ko^vffenn geben hant, daz der spittal der siechen ze sant Gallen⁴ vnd alle iro kneht vnd helffer, die dann ie in dez selben spittals dienst sint, iemer mêr eweklich sumer vnd winter mit wa^egenn mit karren vnd mit schütten geladenen vnd vngeladenen v´ber daz vorgeschriben v´nser gůt, daz man nemmet die Rúti, weg hant vnd haben sont ze varn in den Rudmonten⁵ vnd darus, alz vil vnd alz dik ez in notdurftig ist. Vnd wenne daz selb gůt in buwe la^egi, so sont sv´ ze gelicher wise, alz vor ist beschaiden, weg haben v´ber daz ander gůt, daz da bi gelegen ist, daz vormâls v´nser waz vnd noch v´nser ist. Wa^er aber, daz die selben gu^eter baidú in buwe la^egint, so mugent sv´ varn v´ber wedres gůt sv danne wellent vnd in fůglich ist, vnd doch also, daz sv´ v´ns vnd allen v´nseren erben vnd nachkomen darúber varen sont, so sv´ danne vnscha^edlichost mugent, ân alle geua^erde. Vnd ze vrkúnd der wârhait aller der vorgeschribenen dinge vnd vergiht so han ich Hainrich Růtzzenwiller da vorgenemt fúr mich fúr alle min erben vnd nachkomen min aigen insigel offenlich gehenkt an disen brief. Vnd won ich Johans Růtzzenwiller da vorgenemt aigens insigels niht han, so han ich erbetten minen gůten frúnd Bartholome Kúndigen burger ze sant Gallen, daz er sin insigel fúr mich fúr alle min erben vnd nachkomen gehenkt hat an disen brief. Ich Bartholome Kúndig da vorgenemt vergich, daz ich von ernstlicher bet wegen dez vorgenemten Johansen Růtzzenwillers mines o^ehaims, won er aigens insigels niht hat, min insigel fúr in fúr alle sin erben vnd nâchkomen gehenkt han an disen brief mir vnd allen minen erben vnd nachkomen gantzlich vnscha^edlich. Diz beschach vnd ward dirre brief geben ze sant Gallen an sant Laurencien abent in dem jar, do man zalt von Cristus gebúrt drúzehenhundert jar vnd darnach in dem ahtzigostem jare.

Source Fulltext: Chartularium Sangallense IX, Nr. 5800, S. 465-466.