Allen den, die disen brief lesint, sehint odir ho^erint, kivnden wir brv^odir Cv^onrat der abbt || vnd div samnung von Salmanswiller¹ des ordins von Zitêl des bistv^omis von Costintze, do wir || ze râte wurdin gemainlich, daz wir vnsir gv^ot ze Breginstorf² verko^vfin woltin vnd vns vndir || anderen livtin, die es vailsotton, der frivmige vnd ersam man her Willehalm von Givtingen³ me gv^otis vnd vns nutzlichers bôt denne ieman anderre, daz wir do von im namen ain vnd sibentzig vnd hundert mark lutirs^a) vnd lo^etiges silbers Costintzer gewaegis, der wir vns gaentzeclich erkennint gewert sin von im vnd in vnsern offenen nutz han bekerit, vnd gabin im darumb daz selbe gv^ot ze Breginstorf ze ko^vffenne mit allem dem reht, so dar zv^o ho^erit, bi wasen vnd zwi, gesv^ochtim vnd vngesv^ochtim vnd sunderlich mit dem zehinden vnd den livten, so dar zv^o horte, an V^olrich den Schmit vnd sin husfrowun vnd iriv kint vnd an Maehthilt von Kaltbrunnen⁴ vnd iriv kint, div si fivrst den tag gewan, do dirre ko^vf geschah, div aelliv wir vns selbe behv^obin, swaz aber div selbe Maehthilt e der ko^vf geschah hette kinde, div gabin wir mit den andern livten dem selben hern Wilhelm in ains offenen ko^vfis wis vnd gebint mit disem brief im vnd allen sinen erbon, iemer me eweclich ze besitzenne vnd ze niessin fivr ain zinslehin vmb ain halb pfunt wahses, daz man vns an sante Gallen tag hinnan fivr iemer me gen sol, vnd also daz gv^ot, zehinden vnd livte, als vorgeschriben ist, iemer me rv^eweclich besitzen, vnd ist dirre ko^vf geschehen mit Worten vnd werchen, so von vns baiden dar^b) zv^o notdurftig was, vnd darumbe daz dis staete belibe, so verzihen wir vns alles des rehtis, so wir zem vorgenanten gv^ote, zehinden vnd livten vnd allem dem, so dar zv^o horte, as^c) vorgeschriben ist, hatton de hain wis, vnd gebin es vf mit disem brief also, daz der zins alleweg staete belibe vnserm closter, in swes hand daz gv^ot kome, vnd binden vns hierumb werschaft zerbietinne nah rehte. Dirre brief war gebin ze Salm ans willer, do man zallet von Cristes gebivrt fivnfzehiniv vnd drivzehinhundert jar, an sant Gregorigen tag.

Source Fulltext: Chartularium Sangallense V, Nr. 2917, S. 273-274.